जनता टाइम्स

३ माघ २०७८, सोमबार २०:३०

नेपाली शान्ति सैनिकद्वारा लेबनानमा पोखरी र सार्वजनिक उद्यान निर्माण



काठमाडौ, माघ ३ । संयुक्त राष्ट्रसङ्घको आह्वानमा लेबनानमा शान्ति स्थापनाका लागि तैनाथ बर्दबहादुर गणले नेपाली सेनाको हालसम्मकै सबैभन्दा ठूलो लगानीमा कृषि पोखरी र सार्वजनिक उद्यान निर्माण गरी स्थानीय नगरपालिकालाई हस्तान्तरण गरेको छ ।

त्यहाँ तैनाथ मिसन प्रमुख र फोर्स कमान्डरको प्रतिनिधित्व गर्दै पूर्वी क्षेत्र इलाका कमाण्डर सहायक रथी रमोन अरमाडा भेजक्वोज, महासेनानी कमल बाँनिया र स्थानीय नगरपालिका प्रमुख हसन हिजाजीले परियोजनाको संयुक्तरूपमा उद्घाटन गर्नुभएको हो ।शान्ति मिसनको सबैभन्दा संवेदनशील नगरपालिकाका रूपमा रहेको स्थानीय तह र नागरिक समुदायसँग सम्बन्ध विस्तार गर्ने हेतुले परम्परागत कृषि पेसालाई टेवा पु¥याउन आर्थिक वर्ष २०७५/७६ का लागि उक्त परियोजना छनोट भएको सैनिक जनसम्पर्क तथा सूचना निर्देशनालयले जनाएको छ ।

कोभिड–१९ महामारीका कारण कार्यप्रारम्भ गर्न केही ढिलाइ भए पनि पूर्वविनियोजित बजेट ३१ हजार २०० अमेरिकी डलरकै लागतमा उक्त परियोजना पूरा गरिएको हो । हस्तान्तरण कार्यक्रममा विभिन्न तहका जनप्रतिनिधि, युनिफिल मुख्यालयका स्टाफ, लेबनान सैनिक प्रतिनिधि र स्थानीय नगरवासीको सहभागिता रहेको सेनाले जानकारी दिएको छ । नेपाली शान्ति सैनिकले द्वन्द्वग्रस्त मुलुकहरुको अति संवेदनशील इलाकामा तैनाथ रही आफ्नो अपरेसनल जिम्मेवारीका अतिरिक्त जनहित र सामुदायिक कार्य गर्दै आएको छ ।