काठमाडौं, असार ११ । एमाले भातृ संगठन अनेरास्ववियुले मूल्यवृद्धिविरुद्ध गर्ने भनेको पाँच दिने आन्दोलनका कार्यक्रम फिर्ता लिएको छ । हिजो कार्यक्रमको घोषणा गरेको अनेरास्ववियुले आज सरकारले मूल्य घटाएसँगै आन्दोलनका कार्यक्रम फिर्ता लिएको छ ।

अनेरास्ववियु अध्यक्ष सुनिल बरालले आज एक विज्ञप्ति जारी गर्दै सरकारले घुँडा टेकेकाले आन्दोलन फिर्ता लिने निर्णय गरेको जानकारी दिनुभएको छ । अध्यक्षद्वारा जारी विज्ञप्तिमा भनिएको छ, ‘अनेरास्ववियुको आन्दोलन र निरन्तरको खबरदारी पछि आज सरकारले घुँडा टेकेको छ, यो संगै अनेरास्ववियुले घोषणा गरेको सम्पुर्ण संघर्षको कार्यक्रम स्थागित भएको जानकारी गराउन चाहन्छौं ।’

पेट्रोलियम पदार्थमा मुल्य घटाउने सन्दर्भ सकरात्मक रहेको उल्लेख गर्दै‌ बराले विज्ञप्तिमा दिर्घकालीन समाधान खोज्नु जरुरी रहेको उल्लेख गरिएको छ ।

सरकार निश्चित व्यापारी घरानालाई पोस्न नितिगत भ्रष्टाचारमा व्यस्त रहेको उल्लेख गर्दै यस विषयमा सरकारलाई आफ्ना मातहतका निकाय परिचालन गरेर बजार अनुगमनलाई चुस्त पर्न र बढ्दो महङ्गीलाई नियन्त्रणमा लिन अनेरास्ववियुले माग गरेको छ । महंगी नियन्त्रणमा सरकारले ध्यान नदिए जनताको जनजिविकाको पक्षमा सडकमा उत्रने चेतावनी समेत अनेरास्ववियुले दिएको छ ।

बिज्ञप्तीको पूर्णपाठ

मिति :२०७९/०३/११

विज्ञप्ति

अनेरास्ववियुको आन्दोलन र निरन्तरको खबरदारी पछि आज सरकारले घुँडा टेकेको छ, यो संगै अनेरास्ववियुले घोषणा गरेको सम्पुर्ण संघर्षको कार्यक्रम स्थागित भएको जानकारी गराउन चाहन्छौ । आन्दोलनको क्रममा घाइते हुनु भएका सम्पुर्ण कमरेडहरुको शिघ्र स्वास्थ्य लाभको कामना गर्दछौ र आन्दोलनमा साथ र ऐक्यवद्धता जनाउनु हुने सम्पुर्णमा हार्दिक धन्यवाद व्यक्त गर्दछौं । पेट्रोलियम पदार्थमा मुल्य घटाउने सन्दर्भ सकरात्मक छ । यसको दिर्घकालीन समाधान खोज्नु जरुरी छ ।

पेट्रोलियम पदार्थको मूल्यवृद्धि संगै अति आवश्यक वस्तु र सार्वजनिक यातायातको भाडा पनि निरन्तर बढिरहेको छ । तर पटक-पटकको पेट्रोलियम पदार्थ मूल्यवृद्धिले अन्य क्षेत्रमा पारेको असर र बढ्दो महँगी नियन्त्रण गर्न सरकार असफल भई सकेको अवस्थामा हामीले निरन्तर खबरदारी गर्नु पर्ने देखिन्छ । सरकार निश्चित व्यापारी घरानालाई पोस्न नितिगत भ्रष्टाचारमा व्यस्त छ, आज महङ्गीले जनताको चुलो नबल्ने अवस्था छ, तसर्थ सरकारलाई आफ्ना मातहतका निकाय परिचालन गरेर बजार अनुगमनलाई चुस्त पर्न र बढ्दो महङ्गीलाई नियन्त्रणमा लिन जोडदार माग गर्दछौं । अन्यथा अनेरास्ववियु जनताको जनजिविकाको पक्षमा सडकमा उत्रने चेतावनी दिन चाहन्छ ।

हार्दिक अभिवादन सहित

सुनिता बराल

अध्यक्ष