पाँचथर, २८ भदौ । वर्षापछि गए राति पहिरो झर्दा अवरुद्ध बनेको मेची राजमार्गको फिदिम–काबेली खण्ड सञ्चालनमा आएको छ । अन्यत्र पहिरो नगए पनि सडकभन्दा करिब ३० मिटर माथिबाट ढुङ्गासहितको पहिरो खस्दा काबेली नदी छेउममा मेची राजमार्ग अवरुद्ध बनेको थियो ।

स्थानीयवासीसमेतको सहयोगमा पहिरो पन्छाई प्रहरीले सडक खुलाएको हो । सडक एकतर्फी खुला भएको जिल्ला प्रहरी कार्यालय पाँचथरले जनाएको छ । वर्षापछि पहिरो झर्दा सडक आज बिहानदेखि अवरुद्ध बनेको थियो । सडक सुचारु नहुँदा यात्रुलाई दुईतर्फ रहेका सवारीका साधनले गन्तव्यतर्फ पुर्याएका थिए ।