बाँके, साउन १४

मुटुरोग उपचारका लागि विसं २०७४ असारदेखि क्याथ ल्याब सेवा शुरु गरेको भेरी अस्पतालको सेवा पछिल्लो समयमा प्रभावित हुँदै गएको छ । विशिष्टिकृत स्वास्थ्य सेवाअन्तर्गतको मुटुरोग उपचार सेवा सञ्चालनका लागि स्थापना गरिएको भेरी अस्पतालको क्याथ ल्याब सेवा बजेट र जनशक्तिको अभावका कारण प्रभावित भएको हो ।

भेरी अस्पताल मुटुरोगको उपचार सेवा दिने नेपालको एक मात्र पूर्ण सरकारी अस्पताल हो । रु छ करोड ५० लाखको लागतमा अस्पतालमा क्याथ ल्याब मेसिन जडान गरिएको भएपनि क्याथ ल्याब सञ्चालन गर्न अस्पतालमा नवौँ तहका एक मात्रै मुटुरोग विशेषज्ञ चिकित्सकको दरबन्दी नहुँदा सेवा प्रभावित भएको छ ।

अस्पतालमै दरबन्दी भएका नवौँ तहका मुटुरोग विशेषज्ञ डा कृष्ण अधिकारीको बढुवा भएर एघारौँ तह ९खुला प्रतिस्पर्धाबाट० मा पुगेपछि नवौंँ तहको मुटुरोग विशेषज्ञ पद खाली भएको छ । बढुवा भएका डा अधिकारीको समायोजनका क्रममा वीर अस्पतालमा सरुवा भइसकेको छ । स्वास्थ्य मन्त्रालयले उहाँको ठाउँमा मुटुरोग विशेषज्ञ अझै पठाएको छैन ।

सेवा सञ्चालन गर्नकै लागि भेरी अस्पतालले मेडिकल अफिसर, स्टाफ नर्स र कार्यालय सहयोगी गरी १६ कर्मचारी करारमा छन् । सेवा सञ्चालनका लागि बजेट निकासा भएर नआएको भन्दै अस्पताल व्यवस्थापनले करारमा राखिएका मेडिकल अफिसर, स्टाफ नर्सहरुलाई यो महीनादेखि तलब भत्ता दिन नसक्ने जनाएको छ । बजेट र जनशक्ति अभावले क्याथ ल्याब सेवा सञ्चालनमा समस्या भएको अस्पतालका प्रमुख डा रुपानन्द अधिकारीले बताउनुभयो ।

“क्याथ ल्याब सञ्चालन भएको दुई वर्ष बितिसक्दा पनि आवश्यक जनशक्ति र बजेटको व्यवस्था नहुँदा मुटुरोग उपचार सेवा सङ्कटमा परेको छ”, अस्पतालका प्रमुख डा अधिकारीले भन्नुभयो, “क्याथ ल्याब सेवामा कार्यरत मेडिकल अफिसर, स्टाफ नर्सहरुलाई तलबभत्ता दिन र अत्यावश्यकीय सामग्रीहरु खरीद गर्न वार्षिक रु एक करोड ५० लाख बजेट आवश्यक पर्छ । यसका लागि सरकारले समयमै जनशक्ति र बजेट व्यवस्था गर्नुपर्छ ।”

“मुटुरोग जस्तो अत्यन्त संवेदनशील उपचार सेवामा बजेट र जनशक्ति नहुँदा यसअघि पनि तनावपूर्ण अवस्थामा काम गर्नुपर्ने बाध्यता थियो”, सरुवा हुनुभएका अस्पतालका प्रमुख कन्सल्टेन्ट कार्डियोलोजिष्ट डा कृष्ण अधिकारीले बताउनुभयो । अस्पतालले मुटुरोगका बिरामीको उपचारलाई थप प्रभावकारी बनाउन एन्जियोप्लाष्टी, एन्जियोग्राफी, अस्थायी पेशमेकर राख्ने सेवा पनि सञ्चालन गर्दै आएको छ ।

अस्पतालले हालसम्म १०० भन्दा बढीको एन्जियोग्राफी, १८ बिरामीको एन्जियोप्लाष्टी तथा आठ बिरामीमा अस्थायी पेशमेकर राखेर उपचार गरिसकेको छ । भेरी अस्पतालले काठमाडौँस्थित शहीद गङ्गालाल राष्ट्रिय ह्दयरोग केन्द्रले लिने बराबरकै शुल्क लिएर बिरामीलाई मुटुरोगको उपचार सेवा प्रदान गर्दै आएको छ । अस्पतालमा मुटुरोगसँग सम्बन्धित दैनिक ४० बिरामी उपचारका लागि आउने गरेको जनाएको छ । तीमध्ये करीब ७० प्रतिशत उच्च रक्तचापसम्बन्धी बिरामी रहेका छन् ।

अस्पतालमा मुटुको नशा साँघुरो भएका र ह्दयघातसम्बन्धी समस्या भएका करीब १० प्रतिशत बिरामीका साथै जन्मजात मुटुको समस्या भएका, मुटुको चालमा गडबडी भएका, मुटुको वरिपरि पानी भरिएका, मुटुको बाथ रोगसम्बन्धी समस्या भएका बिरामी रहेको अस्पतालले जनाएको छ । अस्पतालले करारमा राखेका मेडिकल अफिसर, स्टाफ नर्स गरी १६ जनालाई २०७६ साउनदेखि तलबभत्ता दिन नसक्ने पत्र थमाएपछि उपचार सेवा थप प्रभावित हुने निश्चित भएको छ ।