जनता टाइम्स

१३ आश्विन २०७९, बिहीबार १९:०५

क्यालिफोर्नियामा भेटियो लेलेबाट चोरिएको पार्वतीको मूर्ति


काठमाडौं, असोज १३ । ललितपुरको लेलेस्थित सरस्वती कुण्डबाट चोरिएको पार्वतीको मूर्ति अमेरिकाको क्यालिफोर्नियास्थित एक निजी संग्रहमा फेला परेको छ । सन १९८४ मा सो मूर्ति चोरिएको थियो ।

चोरिएका वा हराएका कला–सम्पदाको खोजी तथा पहिचानमा जोडिएको अभियान ‘लस्ट आर्टस् अफ नेपाल’का अनुसार, सन् १९८४ मा लेले सरस्वती कुण्डबाट चोरिएको १४ औं शताब्दीको यो सम्पदा पार्वतीको मूर्तिलाई नेपाल तथा विदेशका बिभिन्न कलाविद्ले आफ्नो सोधमा उल्लेख गर्दै आएका छन् ।

कला अन्वेषक लैनसिंह वाङ्देलको ‘स्टोलन इमेजेज अफ नेपाल’ (१९८९) पुस्तकमा पनि लेले, सरस्वती कुण्डबाट चोरिएको पार्वती मूर्तिबारे उल्लेख गरिएको छ ।

यही मूर्तिबारे लेखक न्यान्सी टिङ्ग्ले र नुतनधर शर्माको पुस्तक ‘सेलेसियल रियाल्म्स ः द आर्ट अफ नेपाल फ्रम क्यालिफोर्निया कलेक्सन्स (२०१३)’ मा समेत उल्लेख छ । तर, निजी संग्रहकर्ताको नाम र विवरण भने अझै अस्पष्ट छ ।