जनता टाइम्स

१३ मंसिर २०७९, मंगलवार १४:२४

विनु यदाव सर्वोच्च अदालतको गेटबाट प्रहरी नियन्त्रणमा


काठमाडौं, १३ मंसिर । महिला हिंसाविरुद्धको १६ दिने अभियान चलिरहेका बेला न्याय माग्न पुगेकी विनु यादव सर्वोच्च अदालतकै गेटबाट प्रहरीको नियन्त्रणमा पर्नुभएको छ ।

पतिबाट आफूमाथि हिंसा भएको र त्यसविरुद्ध न्याय माग्न जाँदा कतैबाट नपाएको गुनासोसहित मंगलबार उहाँ सर्वोच्च अदालत पुग्नुभएको थियो। तर, ट्याक्सीबाट ओलिर्नेवित्तिकै सुरक्षाकर्मीको घेरामा पर्नुभएकी उहाँले आफू बोकेर गएको रातो रंग सर्वोच्च अदालतको गेटमा फ्याँकिन् । घोलिइरहेको रातो रंग गेटमा पोखेकी उहाँलाई तत्कालै प्रहरीले नियन्त्रणमा लिएर गाडीमा राखेको थियो ।

आफूमाथि भएको हिंसा र न्याय नपाएको विरोधमा रातो रंग फ्याँकेकी उहाँले प्रहरीको गाडीभित्रबाट कराइन्, ‘सबै बिक्यो, अदालत बिक्यो, न्यायाधीश बिक्यो, मैले कहाँबाट न्याय पाउने ? १६ दिने अभियान चलाइराख्दा खै पीडितलाई न्याय ?’

उहाँले भनेजस्तै ३१औं अन्तर्राष्ट्रिय महिला हिंसाविरुद्धको १३ दिने अभियान संसारभर चलिरहेको छ । तर, दैनिकजसो महिला हिंसामा परेको, हत्या भएको, न्याय नपाएको घटना सार्वजनिक भइरहेका छन् ।

न्यायकै लागि सर्वोच्च अदालत पुगेकी सिरहाकी विनु प्रहरी नियन्त्रणमा पर्नुभएको हो । प्रहरीले नियन्त्रणमा लिन थालेपछि उहाँले चिच्याउँदै भनिन्, ‘‘मलाई न्याय चाहियो ।’

उहाँको मुद्दा पाटन उच्च अदालतमा विचाराधीन छ । तर, न्यायका लागि भन्दै उहाँ सडक संघर्षम उत्रिन थाल्नुभएको छ । केही महिनाअघि रामेछाप जिल्ला अदालतको इजलासमै विष सेवन गरेर आत्महत्या प्रयाससमेत गर्नुभएकी उहाँले आफूमाथि पतिसहित घरपरिवारबाट शारीरिक र मानसिक रुपमा हिंसा भएको बताउँदै आउनुभएको छ । काका ससूरा पवन कठायतले आफूमाथि बलात्कार प्रयास गरेको उनको आरोप छ ।

विनुसँगै ज्यास्मिन ओझालाई पनि प्रहरीले नियन्त्रणमा लिएको छ ।