बारा, १९ मंसिर । गत बिहीबार भएको सवारी दुर्घटनामा घाइते भएका बारा जितपुरसिमरा उपमहानगरपालिका–५ का ३५ वर्षीय विजयी माझीको उपचारका क्रममा सोही दिन मृत्यु भएको थियो । उपचारमा लागेको खर्च तिर्न नसकेका कारण चार दिनदेखि उनको शव वीरगन्जस्थित अस्पतालमै थियो ।

चन्दा संकलन गरेर स्थानीयले आज शवको पेष्टमार्टम गरी सडकमै शव राखेर प्रदर्शन गरेका छन् । स्थानीय र माझीका आफन्तहरूले जितपुरसिमराको सडकमा अवरोध गर्दै प्रदर्शन गरेका हुन्। सो क्रममा उनीहरूले ठक्कर दिने सवारीसाधन प्रहरीले नखोजेको आरोप लगाएका छन् ।

माझीको मृत्यु सोही दिन साँझ पाँच बजेतिर न्युरो अस्पताल वीरगन्जमा भएको हो । पथलैया–निजगढ सडक खण्डमा दाउरा लिएर आउने क्रममा सेतो रंगको सवारी साधनले साइकलमा सवार माझीलाई ठक्कर दिँएको थियो । ठक्कर दिने सवारी साधनको पहिचान हुन सकेको छैन ।

घाइते माझीलाई उपचारका लागि अस्पताल ल्याइएको थियो । उपचारकै क्रममा उहाँको मृत्यु भए पनि रकम अभावका कारण उहाँको शव अस्पतालमै रहेपछि स्थानीयले चन्दा संकलन गरेर करिब एक लाख ८० हजार अस्पतालमा भुक्तानी गरेर हिजो जिल्ला अस्पताल कलैयामा पोस्टमार्टम गरि शबसहित सडकमा प्रदर्शन गरेका हुन् । पूर्ववडा अध्यक्ष मोहित चौधरीका अनुसार मृतक माझीका चार छोराछोरी छन् ।

दुर्घटना भएको चार दिनसम्म पनि प्रहरीले फरार गाडी फेला नपारेपछि बाध्य भएर शव सडकमै ल्याएर आन्दोलन गर्नु परेको उहाँले बताउनुभयो । आक्रोसित भिडले सडकमा अवरोध गर्दा करिब एक हजार सवारीसाधन सडकमा अलपत्र परेका छन् । उनीहरूले नाराबाजी र प्रदर्शन गरिरहेका छन् । आन्दोलनमा उत्रिएकाहरूले जितपुर चोकमा सवारीसाधन अवरुद्ध पारेका छन्।