काठमाडौं, साउन २६ भारतीय कांग्रेसले सोनिया गान्धीलाई अन्तरिम अध्यक्ष बनाएको छ । कांग्रेस कार्यसमितिको शनिबार बसेको बैठकले पार्टीकी पूर्व अध्यक्षसमेत रहेकी गान्धीलाई अन्तरिम अध्यक्ष बनाएको हो ।

कांग्रेस नेता गुलाम नबी आजाद र हरीश रावतले सोनिया गान्धीलाई अन्तरिम अध्यक्ष बनाएको र राहुल गान्धीको राजीनामा स्वीकृत गरेको जानकारी दिए ।  कुशल नेतृत्वका लागि पार्टीले राहुल गान्धीलाई धन्यवाद व्यक्त गरेको छ ।

लोकसभा चुनावमा भोगेको पराजयपछि गान्धीले राजीनामा दिएका थिए । उनको राजीनामा पार्टीले स्वीकार गरेको छ । तर पार्टीलाई अगाडि बढाउन राहुल गान्धीले महत्वपूर्ण भूमिका खेल्न आग्रह गरेको छ ।

त्यस्तै प्रदेश नेताहरुको राहुल गान्धीलाई नै अध्यक्ष बनाउने प्रस्ताव पनि कार्यसमितले खारेज गरेको छ । पूर्णकालीन अध्यक्ष चयन नहुँदासम्मका लागि सोनिया गान्धीलाई अन्तरिम अध्यक्ष बनाइएको छ ।

कार्यसमिति बैठकले जम्मू–कश्मीरका विषयमा सरकारसँग विपक्षी पार्टीहरुको एउटा समूहलाई त्यहाँको बस्तु स्थिति जान्नका लागि जान दिन अनुरोध गर्ने बताएको छ ।