हैदराबाद, ६ जेठ । गुगलका सीईओ सुन्दर पिचाईको आफ्नो बाल्यकाल बिताएको चेन्नई, भारतको घर बेचिएको छ । पिचाईका बाबुआमाले पुरानो घर जग्गा तमिल अभिनेता तथा निर्माता सी मणिकन्दनलाई बेच्नुभएको हो । मदुरै, तमिलनाडुमा लक्ष्मी र रघुनाथ पिचाईको घरमा जन्मेका सुन्दर पिचाईले आफ्नो सम्पूर्ण बाल्यकाल चेन्नईमा बिताउनुभयो । पिचाईले आईआईटी खड़गपुरमा भर्ना हुनुअघि यहाँ शिक्षा प्राप्त गर्नुभएको थियो ।

सुन्दर २० वर्षको उमेरसम्म यही घरमा बस्ने गर्नुहुन्थ्यो । उहाँ अहिले अमेरिकामा बस्नुहुन्छ । यो घर कति पैसामा बेचियो, यसको जानकारी भने खुलाइएको छैन । द हिन्दु बिजनेस लाईनसँग कुरा गर्दै मणिकन्दनले भन्नुभयो, ‘म आफै रियल स्टेट डेभलपर हुँ । मैले करिब ३ सय घर बनाएको छु । सुन्दर पिचाईले हाम्रो देशलाई गौरवान्वित बनाएका छन् । उहाँ बस्ने घर किन्नु मेरो जीवनको गौरवको क्षण हो ।’

जग्गाका नयाँ मालिक मणिकन्दनले आफ्नो अनुभव बाँड्दै भन्नुभयो, ‘पिचाईको पहिलो सम्पत्ति भएकाले सम्पत्तिको कागजात हस्तान्तरण गर्दा उनका बुबा निकै भावुक हुनु भयो, पिचाईका बुबाले कागजी कार्य पूरा गर्न दर्ता कार्यालयमा घण्टौं धैर्यताका साथ पर्खनुभयो ।’ लेनदेन प्रक्रिया पूरा हुन करिब चार महिना लाग्यो किनकि पिचाईका बुबा त्यतिबेला अमेरिकामा बस्दै आउनुभएको थियो ।

यो घर किन्ने कुरा चलिरहेको बेला सुन्दरकी आमाले व्यक्तिगत फिल्टर कफी बनाएको मणिकन्दनले स्मरण गर्नुभयो । पिचाई अन्तिम पटक सन् २०२१ को अक्टोबरमा चेन्नई आउनुभएको थियो । हवाईअड्डा जाने बाटोमा उहाँ बाल्यकालका सम्झना ताजा गर्न वाणी स्कुलसमेत पुगेका थिए । अहिले सो घर भत्काउने कार्य सुरु भएको छ । जसलाई हरियो रंगको जालीदार कपडाले छोपिएको छ ।