पोखरा, मंसिर २२। नेकपा एमाले मध्यपहाडी लोकमार्ग केन्द्रित विशेष अभियान अन्तर्गत आज नवौं दिन गोरखा पुग्दैछ ।

झुलाघाट-चिवाभञ्ज्याङ समृद्धिका लागि संकल्प यात्राु अभियान अन्तर्गत पार्टी अध्यक्ष केपी शर्मा ओली नेतृत्वको एमालेको टोली कास्कीको पोखराबाट लमजुङ हुँदै गोरखा पुग्न लागेको हो ।

टोली बिहान पोखराबाट हिँडेर लमजुङको सुन्दर बजार पुगेर खाना खानेछ । लमजुङको भोर्लेटार, धमिलीकुवा र गोरखाको पालुङटारमा हुने भेटघाटमा टोली सहभागी हुनेछ । दिउँसो सुन्दर बजारमा हुने सभामा सहभागी भएर टोली साँझ गोरखा बास बस्न पग्ने कार्यक्रम छ ।

सभालाई अध्यक्ष ओलीसहित विभिन्न नेताहरुले सम्बोधन गर्ने कार्यक्रम छ । बिहीबार बिहान गल्कोटबाट सुरु भएको आठौं दिनको यात्रा बाग्लुङ बजार, पर्वतको कुश्मा, नयाँ पुल, रामटार, काँडे, नौडाँडा र हेम्जा हुँदै १ सय ३० किलोमिटर दूरी पार गरेर साँझ पोखरा पुगेको थियो ।