बिराटनगर, १२ साउन । कोशी प्रदेशका मुख्यमन्त्री हिक्मतकुमार कार्कीले लायन्स क्लबहरुले समाजसेवामा महत्वपूर्ण भूमिका निर्वाह गरेको बताउनु भएको छ । लायन्स क्लव विराटनगर सेन्टरद्धारा आज आयोजित पदस्थापना समारोहको उद्घाटन गर्दै उहाँले क्लबले युवाहरुको माध्यमबाट समाजमा रहेका विकृति, विसंगति र अन्धविश्वास प्रथालाई अन्त्य गर्नुपर्नेमा जोड दिनुभयो ।

मुख्यमन्त्री कार्कीले भन्नुभयो,‘राष्ट्रिय सार्वभौम ,नेपाल र नेपाली जनतालाई शिरमा राखी क्लवले गर्ने सामाजिक कार्यमा आगामी दिनमा थप मिलोस ।’ उहाँले समाजमा लागु पदार्थ दुर्ब्यसनको विकराल समस्या भएकोमा चिन्ता व्यक्त्त गर्दै यस कार्यबाट उनीहरुलाई मुक्त गर्न क्लवले काम गर्नुपर्ने बताउनुभयो ।

मुख्यमन्त्री कार्कीले मानव समुदायलाई सुसंस्कृत, अनुशसित एवं सुयोग्य पात्र बनाउने भूमिकामा हामीसबै लाग्नु पर्नेमा जोड दिनुभयो । उहाँले भन्नुभयो,‘हरेक मानिसलाई आफ्नो परिवार, समाज र राष्ट्रका लागि योगदान दिनुपर्छ भन्ने दायित्व बुझाउनु आवश्यक छ ।’

सो अवसरमा सन् २०२४/२५ का लागि सेन्टरका अध्यक्ष फडिन्द्र अधिकारीलाई पदस्थापन गरिएको थियो । सेन्टरले विगत २९ बर्षदेखि सामुदायिक विद्यालय, खानेपानी, जाडोमा गरीवलाई न्यानो कपडा वितरण, बाढी पीडितलाई सहयोग उपलव्ध गर्दै आएको निवर्तमान अध्यक्ष बिमल नेपालले बताउनुभयो । कार्यक्रम लायन्सका गभर्नर बिकास अधिकारीले लायन्सका विविध विषयमा चर्चा गर्नुभएको थियो ।