सुर्खेत, असोज ४ । कर्णाली प्रदेशका मुख्यमन्त्री यामलाल कँडेलले सङ्घीय संरचनाअनुसार अझै मानसिकतामा परिवर्तन हुन नसकेको बताउनु भएको छ । वीरेन्द्रनगरमा आयोजित सङ्घीयता सबलीकरणसम्बन्धी अन्तरक्रिया कार्यक्रममा मुख्यमन्त्री कँडेलले देश सङ्घीय संरचनामा गए पनि मानसिकता भने परम्परागत केन्द्रीयतानुसार नै रहेको बताउनुभयो ।

मुख्यमन्त्री कँडेलले विकास साझेदार तथा दातृ निकाय पनि काठमाडौँ केन्द्रीत मानसिकतामा रहेको धारणा राख्नुभयो । ‘राजनीतिक रूपमा पालिका र प्रदेश सरकारका संरचना बनायौँ तर त्यहीअनुसार सुदृढतापूर्वक अगाडि बढ्न सकेका छैनौँ । यसमा सुधार गर्नुपर्ने आवश्यकता छ,’ मुख्यमन्त्री कँडेलले भन्नुभयो,’सबै तहका संवैधानिक अधिकारको कार्यान्वयनका लागि समयसापेक्ष संविधान संशोधनका लागि मतैक्यता बनाउनतर्फ लाग्नुपर्छ । यसमा निर्वाचित जनप्रतिनिधि, मन्त्री र विशेष गरी दलका नेतृत्वहरूको भूमिका बढी छ ।’

मख्यमन्त्री कँडेलले कर्णालीमा वित्तीय स्रोतको वितरण असन्तुलित रहेकाले यसका सूचक बदल्नुपर्ने र वित्तीय सङ्घीयताका विषयमा सङ्घीय सरकार थप उद्धार हुनुपर्नेमा जोड दिनुभयो । सङ्घीय सरकारले अन्य प्रदेश सरह बाँडफाँड गर्ने राजश्व कर्णालीका लागि न्यायोचित नभएको उहाँको भनाइ थियो ।

कार्यक्रममा आयोजक फेडरालिज्म एण्ड लोकलाइजेसन सेन्टर ललितपुरका अध्यक्ष डा खिमलाल देवकोटाले संविधान कार्यान्वयन, सङ्घीयता सबलीकरण, सङ्घ, प्रदेश र स्थानीयमा स्रोत बाँडफाँड सुनिश्चितताको अवस्थाबारे आफ्नो कार्यपत्र प्रस्तुत गर्नुभयो । सेन्टरका निर्देशक तथा संविधानसभा सदस्य प्रल्हाद लामिछानेले पछिल्लो समय संविधान र सङ्घीयताका विषयमा उठेका सवालमा सहजीकरण गर्ने उद्देश्यले अन्तरक्रिया कार्यक्रम अगाडि बढाइएको बताउनुभयो ।

डा दीपेन्द्र रोकायले सङ्घीयता कार्यान्वयनका क्रममा प्रदेश तथा स्थानीय तहमा भएका असल अभ्यास, मूलभूत समस्या तथा गर्नुपर्ने सुधारका बारेमा सातवटै प्रदेशबाट सुझाव लिन थालिएको बताउनुभयो ।