भक्तपुर, असोज २४ । प्रमुख जिल्ला अधिकारी रोशनीकुमारी श्रेष्ठले हालैको बाढीपहिरो तथा डुबान प्रभावितलाई सरकारले उपलब्ध गराएको तीन लाख रकमसहित अन्य सामग्री वितरण गर्नुभएको छ ।

पहिरोमा पुरेर घरभित्रमा परी ज्यान गुमाएका मृतकका आफन्तलाई सङ्घीय विपद व्यवस्थापन कोष र प्रदेश विपद व्यवस्थापन कोषबाट उपलब्ध गराएको राहत रकमसहित राहत सामग्री लिएर उहाँ आफैँ पहिरोपीडितको बासस्थान पुग्नुभएको हो ।

जिल्ला विपद् व्यवस्थापन समितिका संयोजकसमेत रहनुभएका प्रजिअ श्रेष्ठले सूर्यविनायक नगरपालिका-८ स्थित आशापुरी नैचालमा पहिरोमा परेर मृत्यु भएका प्रतिमा तामाङका परिवारलाई तीन लाख र मृतक सुकुमाया तामाङको श्रीमान् तथा छोराहरुलाई तीन लाख नगद हस्तान्तरण गर्नुभएको हो ।

यही असोज १२ गतेकै पहिरोमा परेर कालीकोट सानो त्रिवेणी-५ घर भई सूर्यविनायक -९ पलाखे बस्ने मृतक दमिला शाही र निजको छोरी प्रिया बमको दुई जनाको परिवारलाई तीन लाख रुपैयाँ गणेश बमको बैंक खातामा जम्मा गरिदिएको प्रजिअ श्रेष्ठले जानकारी दिनुभयो ।

त्यस्तै पहिरोमा परेर घाइते हुनुभएका सानु तामाङ र कान्छा तामाङको भने भक्तपुर अस्पतालमा निःशुल्क उपचार गरी राहतस्वरुप १५ हजार रुपैया राहत रकम उपलब्ध गराएको उहाँले जानकारी दिनुभयो । मृतक परिवारलाई प्रजिअ श्रेष्ठले मृतक परिवारलाई तत्काल बासस्थानका निर्माणका लागि दुई वटा टेण्डर, तीन वटा त्रिपाल र भाँडाकुँडा दुई सेट हस्तान्तरण गर्नुभएको छ ।

त्यसैगरी सूर्यविनायक नगरपालिकाले पनि सोही पहिरोमा परी ज्यान गुमाउने पाँच जनाकै परिवारलाई एक लाखको दरले राहत रकम प्रदान गरेको छ । नगर प्रमुख वासुदेव थापाको नेतृत्वमा उपप्रमुख सरिता भट्टराईसहित गएका जनप्रतिनिधि टोलीले पीडितका बासस्थानमै पुगेर तामाङ परिवारलाई जनही एक लाख रुपैयाँको दरले रकम हस्तान्तरण गर्नुभएको हो ।

विस्थापितलाई टेन्ट र भाँडाकुँडा वितरण गरिइएको थियो । जिल्लामा ४० घर अझै पहिरोको उच्च जोखिममा रहेको जनाउँदै सात घरपरिवारलाई अन्यत्रै सारिएको प्रजिअ श्रेष्ठले जानकारी दिनुभयो ।