सुनसरी, कात्तिक १८ । सुनसरीको बराहक्षेत्र नगरपालिकामा जुवा खेलिरहेको अवस्थामा प्रहरीले १५ जनाइलाई पक्राउ गरेको छ।

आइतबार बिहान पौने ५ बजे सुनसरी बराहक्षेत्र नगरपालिका ३ नडाहास्थित जीवन कार्कीको घरमा जुवा खेलाइरहेको अवस्थामा उनीहरु पक्राउ परेका हुन । जिल्ला प्रहरी कार्यालय सुनसरीका प्रवक्ता प्रहरी नायव उपरीक्षक (डीएसपी) रामप्रसाद तिमल्सिनाले गोप्य सूचनाका आधारमा कार्कीको घरमा पामा हान्दा उनीहरु जुवा खेलिरहेको अवस्थामा रङ्गे हात फेला परको जानकारी दिनुभयो ।

जिल्ला प्रहरी कार्यालय सुनसरीबाट प्रहरी निरीक्षक पर्शुराम राई र इप्रका पकलीबाट प्रहरी निरीक्षक लेखनाथ दाहालसहित १४ जनाको प्रहरी टोली परिचालन कार्कीको घरमा छापामारी उनीहरूलाई पक्राउ गरिएको डीएसपी तिमल्सिनाको भनाई छ ।

प्रहरीले जुवा खालबाट ८ लाख ६६ हजार ५ सय नगद बरामद गरेको छ। त्यस्तै पक्राउ परेकाहरुको साथबाट एकलाख एक हजार ५ सय नगद गरी जम्मा ९ लाख ६८ हजार रुपैयाँ बरामद गरिएको प्रहरीले जनाएको छ । पक्राउ परेका सबैलाई इलाका प्रहरी कार्यालय महेन्द्रनगरको हिरासतमा राखेर अनुसन्धान अघि बढाइएको छ ।