काठमाडौं, १४ साउन ।  मकवानपुरमा एक जनाको हत्या भएको छ। जिल्लाको बागमती गाउँपालिका(९ बेतिनीका ५७ वर्षीय राम बहादुर वाइबाको शनिबार बिहान धारिलो हतियार प्रहार गरी हत्या भएको हो। उनको हत्या आरोपमा बेतिनीमा रहेको स्वास्थ्य चौकीका कार्यालय सहयोगी बारा निजगढ नगरपालिका– ३ सिंगोलका ३५ वर्षीय कुमार थापा पक्राउ परेका छन्। जिल्ला प्रहरी कार्यालय मकवानपुरका डिएसपी श्यामु अर्यालका अनुसार थापाले वाइबामाथि खुर्पा प्रहार गरेका थिए।

थापाले वाइबाको घाँटीमा खुर्पा प्रहार गरेका थिए। थापाले नजिक जो आउँछ त्यसलाई पनि मार्छु भनेर धम्की दिएको भन्दै खबर आएपछि प्रहरी घटनास्थलमा पुगेको थियो। प्रहरीले थापालाई नियन्त्रणमा लिएर खुर्पा प्रहारबाट गम्भीर घाइते भएका वाइबालाई अस्पताल पुर्‍याएको थियो । बिहान ७ः४५ बजे बेतिनी स्वास्थ्य चौकीका चिकित्सकले चेकजाँच गरी मृत घोषणा गरेको थियो। मृतकको शव पोस्टमर्टमका लागि हेटौंडा अस्पताल पठाएको छ।