मूख्य समाचारविचार / ब्लग

कालापानीको ढुङ्गाले खुकुरीको धार लगाउने बेला आयो

 रबिन श्रेष्ठ ‘रगत’

नेपाल भारत सिमानामा रहेको नेपाली भूमि कालापानी–लिपुलेक लिम्पियाधुरालाई भारतले शक्तिको आडमा एकपक्षीय रुपमा आफनो भुमि भएको भन्दै राजनैतिक नक्सा निकालेको छ । भारतीय बिदेश मन्त्रालयका प्रवक्ताले अहमताका साथ नेपाली भुमि आफ्नै भुमि भएको दावी गरेता पनि यो भूमि नेपालकै हो ।

नेपाली भुमिमा लामो समयदेखि अतिक्रमण गरी बसेको भारतले सिमानामा बिबाद निकाली हडप्ने कोशिष गरेको कुरा सर्बविदितै छ । दाइको अगाडि भाइ बोल्न नसकेर डर माने जस्तो, समाजमा गन्य मान्य टाठो बाठो दाइले भाइको सम्पतिमा कुदृस्टी लगाएर साँध मिच्या जस्तो बेला बेलामा भारतले नेपालको सिमाना मिच्दै आएको छ । हिजोका नेपालका साशक मुकदर्शक बने, जस्ले भारतको मनोवल थप बलियो बन्यो । आज त्यस्तो अवस्था छैन । परिस्थितिमा फेरबदल आएको छ ।

सिंगो देश एक बनेको अवस्था छ, सीमा रक्षाको खातिर । सरकारले कुटनीतिक पहल थालिसकेको छ । अव नागरिक तहमा पनि बिगतको गौरुवगाथा भारतलाई सम्झाउने बेला आएको छ । बिश्वको इतिहासमा हामी नेपालीको आफ्नै पहिचान छ, आफ्नै स्वाभिमान छ । दुई देशको बिचमा रहेको सानो देश भए पनि नेपालको इतिहास गर्विलो छ, छाती चौडा छ, जहाँ हामी हार्न जानेका छैनौं । सयौं बर्षसम्म ब्रिटिश सरकारले गुलामी गर्न बाध्य बनाएको देश हो भारत । ब्रिटिश सरकारको इस्ट इन्डिया कम्पनीको अधिनायकत्वमा बर्षौंसम्म अधिनस्त भारत बन्यो । तर भारतले विश्व इतिहासमा कहिल्यै नहारेको अनि झुक्दै नझुकेको वीर गोर्खालीको देशको भुमि अतिक्रमण गर्ने जुन दुस्साहास गरेको छ, त्यो स्विकार्य छैन र हामी नेपालीको स्वाभिमानले पनि दिँदैन ।

अव सहजताका साथ भारत पछि हटदैन भने यस्ता दुस्साहसलाई निस्तेज पार्न, कालापानी, लिपुलेक र लिम्पियाधुराको ढुङ्गामा खिया लागेर बसेको खुकुरीलाइ झिकेर धार लगाउनुपर्छ । धारिलो बनाइ देशको स्वाधीनता, स्वाभिमान र आफ्नो मातृभुमिको खातिर सिरुपाते खुकुरीले छ्प्काउनु पर्छ । जङ्गे पिलरमा त्यही रगतले आफ्नो भुमिको सिमाना कोदै चन्द्र सुर्य अंकित झन्डा फरफहराउनु पर्छ । सीमानामा नेपाली सेना पठाउनु पर्छ । देशको सिमानामा कसैले धावा बोल्छ भने त्यस्को प्रतिक्रिया सैन्इ बलदेखि नागरिकसम्मले दिनुपर्छ ।

हामी बिश्वको सिरमा छौं र हाम्रो सिरको कुनै पाखा कसैले छुन खोज्छ भने एकचोटि वीर पुर्खाहरुलाइ सम्झेर आफ्नो अस्तित्व जोगाउनलाई एकजुट भै आइलाग्नेमाथि जाइलाग्नु पर्छ । भारतले नेपाल सधै भारतमुखी होस, आयात निर्यात भारतकै मार्ग हुँदै गरोस भन्ने चाहान्छ । नेपालमा राजनैतिक झमेला गराइ त्यस्को प्रत्यक्ष फाइदा आफुले लिन्छ । नेपालको राजनैतिक पहुच विश्व स्तरमा नपुगोस भन्ने चाहान्छ । यसर्थ हामी नेपाली यसरी पनि बुझ्न सक्छौ कि यदि नेपाल भबिष्यमा एकाएक शक्ति राष्ट्र बन्यो भने हिजो नेपालले गुमाएको भुभाग खोस्न पनि सक्छ भन्ने त्रास छ भारतसँग ।

यसैले भारतको भूमि नछोइकन कालापानी लिपुलेख हुँदै चाइनाको बाटो हुँदै पाकिस्तानको बन्दरगाहसम्म पुग्न सकिने कालापानी लिपुलेकलाई आफ्नो भुमी भनी कब्जा गरी नेपाललाई आफ्नो मुठिमा राख्न हेपाहा प्रवृत्ति देखाउदैछ । नेपालले भारतको सहकार्यबिना प्रगती नगरोस, अन्य बाटोहुँदै कुनै पनि कार्य नगरोस भन्ने चाहान्छ भारत ।

जुन कुरा हामी नेपालीलाई स्विकार्य छैन । यस्को लागि हामी वीर गोर्खाली जस्तोसुकै मुल्य चुकाउन पनि पछि पर्ने छैनौं । नेपालमा उपनिर्बाचनको माहोल ताती राखेको छ । नेपाली जनता त्यही माहोलमा झुमिहाल्छन र भुमी कब्जा गर्ने योजना सफल हुन्छ भन्ने जुन अस्त्र प्रयोग भारतले गरेको छ। त्यस्तो कदापी हुन दिनु हुन्न । यस्तो अबस्थामा सम्पुर्ण देशप्रेमीहरु राष्टियताको झण्डा बुलन्द गर्दै एक ठाउँमा उभिनुपर्छ । तसर्थ पार्टीको झन्डा होइन, देशको झन्डा उठाउ, सरकारलाई झकझक्याउ र आफ्नो मातृभुमिको रक्षा गरौं । सरकारले छिटो भन्दा छिटो कुटनैतिक प्रयासबाट यो समस्या सुल्झाउनु पर्छ । अन्यथा इतिहासले हामीलाई धिक्कार्ने छ । जय देश, जय स्वाभिमान

(लेखक स्याँजाको चापाकोट नगरपालिका ८ रत्नपुर निवासी हुन)

Comment here