काठमाडौं, भदौ ६ । नेपाल शिक्षक महासंघले विद्यालय शिक्षा विधेयकले यस अघिको सहमति सम्बोधन हुन नसकेको भन्दै पुनः आन्दोलनको चेतावनी दिएको छ ।

शुक्रबार महासंघले पत्रकार सम्मेलन गर्दै पहिलो चरणका आन्दोलनका कार्यक्रमहरू सार्वजनिक गरेको हो । नेपाल शिक्षक महासंघका अध्यक्ष लक्ष्मीकिशोर सुवेदीले विधेयक सकारात्मक रहे पनि शिक्षक कर्मचारीका सरोकारका र विगतका सहमतिमा रहेका विषयहरू सम्बोधन हुन नसकेको बताउनुभयो । ‘केही अन्य विषयमा विधेयक सकारात्मक रहे पनि शिक्षक कर्मचारीका  सरोकारका र विगतका सहमतिमा रहेका विषयहरू सम्बोधन हुन सकेका छैनन्, अस्थायी प्रकृतिका शिक्षकको स्थायित्वका लागि तोकिएको आन्तरिक परीक्षाको प्रतिशत सहमति अनुसार नहुनु, गोल्डेन हेन्डसेक अन्तर्गत किटान गरी नतोकिनु, स्थायी शिक्षकको आवधिक बढुवाको प्रबन्ध समावेश नहुनु लगायतका विषयहरू सम्बोधन नभएको देखिन्छन्’, उहाँले भन्नुभयो ।

विद्यालय शिक्षामा वर्षौँदेखि बाँकी रहेका समस्या हल गरी उन्नत र गुणस्तरीय विद्यालय शिक्षाको प्रबन्ध गर्न विद्यालय शिक्षा ऐन चाहिएको भन्दै उहाँले विगतमा भएका सहमतिमा भएका विषयहरू ऐनमार्फत सम्बोधन हुनुपर्ने माग गर्नुभयो ।

पहिलो चरणका आन्दोलनका कार्यक्रमहरू:

१. २०८२ भाद्र ६ गते पत्रकार भेटघाट मार्फत आन्दोलनको जानकारी सार्वजनिक गर्ने।

२. भाद्र ९ गते सम्माननीय प्रधानमन्त्री, माननीय शिक्षा, विज्ञान तथा प्रविधि समक्ष तथा राजनीतिक दलका प्रमुख सचेतक ध्यानाकर्षण पत्र पेश गर्ने ।

३. २०८२ भाद्र ११ गतेदेखि २० गतेसम्म केन्द्रमा सबै राजनीतिक पार्टीका कार्यालय पत्र बुझाउने र त्यही २ घण्टा प्रतिनिधिमूलक धर्ना गर्ने ।

४.२०२ भाद्र १३ गते शुक्रवार सबै पालिकामा २ भाद्र १२ गते आइतबार सबै जिल्ला समन्वय एकाइमा प्रतिनिधिमूलक उपस्थितिमा ध्यानाकर्षण पत्र बुझाउने र ३ घण्टा धर्ना दिने ।

५. २०८२ भाद्र २१ गते दोस्रो चरणका कार्यक्रम सार्वजनिक गर्ने यो चरणमा अवरोध विरोध प्रदर्शन लगायतका कड़ा कार्यक्रम ल्याइने ।