काठमाडौं, पुस २। नेकपा (एमाले) को ११ औँ राष्ट्रिय महाधिवेशनअन्तर्गत जारी निर्वाचन प्रक्रियामा मतदानका लागि मतदान केन्द्रमा प्रवेश गर्ने समय राति १० बजेसम्म थप गरिएको छ । महाधिवेशन प्रतिनिधिहरूको सहभागिता सुनिश्चित गर्न समय थपिएको हो ।

एमालेका निवर्तमान महासचिव शंकर पोखरेलले मतदान प्रक्रियाबारे जानकारी दिँदै सहभागी सबै प्रतिनिधिलाई समयमै आफ्नो मतदान अधिकार सुरक्षित गर्न आग्रह गर्नुभयो । ‘मतदानका लागि मतदान केन्द्रमा प्रवेशको समय राति १० बजेसम्म थप गरिएको छ, सहभागीका लागि कुपनको व्यवस्था समेत गरिएको छ, कुपन लिएर मतदानको अधिकार समयमै सुरक्षित गरौँ,’ उहाँले भन्नुभयो ।

निर्वाचन आयोगका अनुसार विद्युतीय मतदान मेसिनमार्फत मतदान भइरहेको छ । प्रतिनिधिहरूले प्रवेशको समयभित्र मतदान केन्द्रमा उपस्थित भई कुपन लिएपछि निर्धारित प्रक्रियाअनुसार मत हाल्न सक्नेछन् । समय थपिएसँगै ढिलाइका कारण मतदानबाट वञ्चित हुने सम्भावना न्यून हुने अपेक्षा गरिएको छ ।

महाधिवेशनमा सहभागी २ हजार २ सय ६३ प्रतिनिधिका लागि मतदान प्रक्रिया व्यवस्थापन गर्न कुपन प्रणाली लागू गरिएको निर्वाचन आयोगले जनाएको छ । यसले मतदान केन्द्रमा भीड व्यवस्थापन र मतदान प्रक्रिया व्यवस्थित बनाउन सहयोग पुग्ने बताइएको छ ।

महाधिवेशनअन्तर्गत केन्द्रीय कमिटी, केन्द्रीय अनुशासन आयोग र केन्द्रीय लेखा आयोगका पदाधिकारी तथा सदस्य चयनका लागि मतदान भइरहेको छ । बिहान ९ बजेदेखि मतदान सुरु भएको भए पनि मतदाताहरू विद्युतीय मेसिनमा मतदान गर्न अभ्यस्त नभएको कारण मत हाल्न निक्कै ढिलाइ भएको छ । अझसम्म आधा मत पनि खसेको छैन ।

एमालेको ११ औँ महाधिवेशनबाट चयन हुने नयाँ नेतृत्वले पार्टीको भावी राजनीतिक दिशा तय गर्ने भएकाले निर्वाचन प्रक्रियालाई चासोका साथ हेरिएको छ ।