काठमाडौं, पुस २८ । नेकपा एमाले वाग्मती प्रदेश कमिटीले उपत्यकाबाहेकका १० जिल्लामा प्रतिनिधिसभा निर्वाचनका  लागि निर्वाचन क्षेत्र र जिल्लाबाट आएका उम्मेदवार सिफारिसमा संशोधन गर्दै केन्द्रमा पठाउने निर्णय गरेको छ।

प्रदेश सचिवालयको बैठकले आगामी फागुन २१ गते हुने प्रतिनिधिसभा निर्वाचनका लागि वाग्मती प्रदेशअन्तर्गतका १० जिल्लाका १८ निर्वाचन क्षेत्रमा जिल्ला कमिटीबाट प्राप्त सिफारिसलाई आधार मानी केही नाम थपेर केन्द्रमा पठाउने निर्णय गरेको हो। पार्टी सचिव प्रदेश संयोजक महेश बस्नेतका अनुसार जिल्लाबाट आएका सिफारिसमा आवश्यक समन्वय र सन्तुलन मिलाउँदै संशोधन गरिएको छ।

निर्णयअनुसार सिन्धुलीका दुईवटै निर्वाचन क्षेत्र, सिन्धुपाल्चोकका दुई क्षेत्र, काभ्रेपलाञ्चोकका दुई क्षेत्र, धादिङका दुई क्षेत्र, नुवाकोटका दुई क्षेत्र, मकवानपुरका दुई क्षेत्र तथा चितवनका तीन निर्वाचन क्षेत्र,  रामेछाप, दोलखा र रसुवाका लागि उम्मेदवार सिफारिस गरिएको छ।

प्रदेश कमिटीले सम्बन्धित जिल्ला कमिटीका सिफारिसलाई प्राथमिकतामा राख्दै समावेशिता, संगठनात्मक अनुभव र निर्वाचनको सम्भावनालाई ध्यानमा राखेर नाम केन्द्रमा पठाइएको जनाएको छ। अब केन्द्रले प्रदेशबाट प्राप्त सिफारिसको आधारमा अन्तिम उम्मेदवार चयन गर्नेछ।

यस निर्णयसँगै बागमती प्रदेशमा एमालेको उम्मेदवार चयन प्रक्रिया औपचारिक रूपमा केन्द्रतर्फ प्रवेश गरेको छ भने आन्तरिक छलफल र समीकरण पनि तीव्र हुने देखिएको छ।

यसै  बिच आज बसेको नेकपा (एमाले) वाग्मती प्रदेश संगठन कमिटीको बैठकले भोलि दिउँसो १ बजे काठमाडौंकाे ए वान पार्टी प्यालेसमा वाग्मती प्रदेश अन्तर्गतका सबै निर्वाचन क्षेत्रबाट सिफारिस गरिएका उम्मेदवारहरूको अन्तरक्रिया कार्यक्रम आयोजना गर्न निर्णय गरेको छ । कार्यक्रममा उम्मेदवारहरू, जिल्ला इन्चार्जहरू, वाग्मती प्रदेश कमिटी सचिवालय र पदाधिकारीहरू तथा  जिल्ला अध्यक्षहरूलाई आमन्त्रण गरिएको छ ।

यी हुन् प्रदेशबाट सिफारिस भएका नामहरु :