ताप्लेजुङ, माघ १० । नेकपा एमालेले ताप्लेजुङका दुई नेताहरूमाथिको कारवाही फुकुवा गरेको छ ।

कारवाही फुकुवा हुनेमा एमाले ताप्लेजुङका पूर्वअध्यक्ष तथा कोशी प्रदेश कमिटी सल्लाहकार सदस्य बलबहादुर साम्सोहाङ र कोशी प्रदेश पर्यटन विभाग सचिव मणिशंकर पोमू रहनु भएको छ । एमाले कोशी प्रदेश कमिटीले पुस ९ गतेको मितिबाट कारवाही फुकुवा भएको पत्र पठाएर सो जानकारी दिएको हो ।

एमाले कोशी प्रदेश कमिटीले कार्वाही फुकुवाको बोधार्थ ताप्लेजुङ जिल्ला कमिटी र केन्द्रीय संगठन विभागलाई दिएको छ । मंसिर ११ गतेको पत्रले साम्सोहाङ र पोमूलाई १५ दिनको स्पष्टीकरण सोधेर कार्वाही गरेको थियो ।

साम्सोहाङ कोशी प्रदेश सरकारका पूर्वमन्त्री हुनुहुन्छ भने पोमू एमाले ताप्लेजुङका पूर्वउपसचिवको जिम्मेवारी सम्हालिसक्नु भएको नेता हो । फुकुवाको पत्र पाएपछि पोमूले सामाजिक सञ्जालमा ‘राजनीतिक यात्रामा छौं, कहिले ताली, कहिले गाली कहिले अपमान, कहिले मान सम्मान, स्वभाविक नै हो, तर म नेकपा एमाले पार्टीको नीति र विचारमा सधै प्रतिबद्ध हुनेछु पार्टीभित्रको सत्य र न्याय पक्षमा सतिसाल झै उभिनेछु’ लेख्नुभएको छ ।

यो संगै दरिलो संगठन भएको ताप्लेजुङ एमालेमा देखिएको किचलो सकिएर निर्वाचनमा एकता जुट्ने संकेत देखिएको छ ।