उहाँका अनुसार ४९ किलोमिटरमध्ये सडकको ट्र्याक खोल्ने काम प्रायः सम्पन्न भइसकेको छ । हालसम्म राकाथुमदेखि जोरधारासम्मको ११ किलोमिटर सडक निर्माणकार्य पूरा भएको छ ।

त्यसैगरी खुर्कोटदेखि पलासेसम्मको ११ किलोमिटर सडक निर्माण कार्य अहिले सञ्चालनमा रहेको छ । तर बाँकी २७ किलोमिटर सडक निर्माणको काम भने बजेट नआउँदा सुरु हुन सकेको छैन ।

सूचना अधिकारी श्रेष्ठका अनुसार बाँकी निर्माण कार्य दुई खण्डमा विभाजन गरिएको छ । पलासेदेखि राकाथुमसम्मको १४ किलोमिटर र जोरधारादेखि चौँरीखोलासम्मको १३ किलोमिटर सडक निर्माणका लागि बहुवर्षीय योजनाअन्तर्गत स्रोत सहमति माग गरी सम्बन्धित निकायमा पठाइएको भए पनि बजेट प्राप्त नभएकाले काम अघि बढ्न नसकेको उहाँले बताउनुभयो ।

यसैबीच, लामो समयदेखि रोकिएको सेलेघाट पुल निर्माण भने यस वर्षदेखि पुनः अघि बढेको छ । तर बाँकी सडक खण्डका लागि आवश्यक बजेट सुनिश्चित नभएकाले समग्र आयोजनाको प्रगति प्रभावित भएको कार्यालयले जनाएको छ ।

यो सडक निर्माण सम्पन्न भएमा काठमाडौंबाट बीपी राजमार्ग हुँदै पूर्व जाने यात्रुहरूका लागि वैकल्पिक मार्ग तयार हुने र पूर्वतर्फको यात्रा अझ सहज तथा छिटो हुने छ ।