धनगढी, मंसिर १९

नेपाल कम्युनिस्ट पार्टी (नेकपा) अध्यक्ष पुष्पकमल दाहाल ‘प्रचण्ड’ले नेपाल–भारत सीमा विवादको निकासको लागि कूटनीतिक पहल जारी रहेको बताउनु भएको छ । उहाले कूटनीतिक र राजनीतिक रुपमा यसलाई टुंगोमा पु¥याउने बताउनु भयो ।

विहीवार धनगढीमा प्रेस संगठन नेपालले आयोजना गरेको पत्रकार सम्मेलनमा उहाले निकासको लागि कूटनीतिक र राजनीतिक तवरले पहल जारी रहेको बताउनु भयो ।

‘राष्ट्रिय सहमति बनेको छ । लिम्पियाधुरा नै महाकालीको मुहान हो र महाकाली सीमा नदी हो । यसमा कुनै कन्फ्युजन छैन । सरकारले अब राजनीतिक र कूटनीतिक ढंगले तुरुन्तै पहल गरेर त्यो क्षेत्र फिर्ता ल्याउन प्रक्रिया अगाडि बढाउनुपर्छ भन्ने सुझाव त्यो सर्वपक्षीय छलफलले दिएको थियो । त्यो अनुसार सरकारले परराष्ट्र मन्त्रालयमार्फत भारतलाई पत्र पठाएको छ । त्यसको उत्तर आइसकेको छैन’, उहाले भन्नुभयो ।

अध्यक्ष प्रचण्डले सीमा मुद्दालाई अन्तर्राष्ट्रियकरण गर्ने बेला नआएको पनि स्पष्ट पार्नुभयो । नेता प्रचण्डले भारतीय पक्षमाथि कडा टिप्पणी भने गर्नुभएको छ । केही दिनअघि नेपालका लागि भारतीय पूर्व राजदूत श्याम शरणले कालापानी मुद्दालाई लिएर ‘नेपालका राजनीतिक दलले राजनीतिकरण गरे नेपालको लागि राम्रो हुँदैन’ भन्ने धारणालाई लक्षित गर्दै प्रचण्डले कडा टिप्पणी गर्नुभयो । ‘पहिलो कुरा उहाँले कसरी भन्नुभयो भन्ने एउटा आर्टिकल पनि आयो भन्ने मैले सुनेको छु । उहाँले ८० लाख नेपालीको कुुरा पनि गर्नु भएछ । यसलाई राजनीतिकरण गरियो भनेर मैले पनि सुने । यो कुरा बिल्कुलै जायज छैन,’ अध्यक्ष प्रचण्डले भन्नुभयो, ‘श्यामशरण जस्तो कूटनीतिक रुपले परिपक्व मानिन्थ्यो । उहाँले यो किसिमको भाषा प्रयोग गर्नु कहीँकतै शोभनीय छैन । हामीले कुनै राजनीतिकरण गर्न खोजेका छैनौं । नेपालको भूमि नेपालको हो, भनेका छौं । संवाद र राजनीतिक पहलमार्फत हल गर्ने कुरा गरेका छौं । यसलाई राजनीतिकरण भएको श्यामशरणजीले देख्नुभएको छ भने उहाँको दृष्टिदोष हो । नेपाल राष्ट्र एक छ ।’