काठमाडौं, असोज १८ । भारत र वेस्टइन्डिजबीचको तीन खेलको एकदिवसीय क्रिकेट शृंखलामा वेस्टइन्डिज क्लिन स्वीप हुनबाट जोगिएको छ।

भारतले शृंखला २–१ ले जितेको हो। पहिलो खेलमा भारतले वेस्टइन्डिजलाई ८ विकेटले पराजित गरेको थियो भने दोस्रो खेलमा पनि ८ विकेटकै जित निकालेको थियो।

शनिबार चण्डीगढमा भएको तेस्रो तथा अन्तिम खेलमा भने वेस्टइन्डिजले भारतलाई ५ विकेटले पराजित गरेको हो।

भारतले दिएको ३५२ रनको लक्ष्य वेस्टइन्डिजले ५ विकेट गुमाएर पूरा गरेको थियो। वेस्टइन्डिजका शाई होपले अविजित १६२ रन बनाएर टोलीलाई जित दिलाउन महत्वपूर्ण योगदान दिनुभयो।

यससँगै वेस्टइन्डिजले तीन खेलको शृंखलामा भारतसँग २–१ को नतिजा बेहोरेको छ।