काठमाडौं, असोज २३ । पशुपतिनाथ मन्दिर परिसरमा टिकटक भिडिओ बनाएको आरोपमा पक्राउ परेका इटहरीका एक जोडी दशैँअघि रिहा हुन कठिन देखिएको छ। अदालतको बिदाका कारण उनीहरूको हिरासत अवधि लम्बिन सक्ने सम्भावना रहेको छ।

पक्राउ पर्नेमा इटहरी उपमहानगरपालिका–८ का ३१ वर्षीय आसिम अन्सारी र उनकी पत्नी ३१ वर्षीया प्रियंका परियार रहेका छन्। उनीहरूलाई प्रहरीले इटहरीस्थित रङ्गशालाबाट पक्राउ गरी काठमाडौं ल्याएको थियो।

उनीहरूविरुद्ध पशुपति क्षेत्र विकास कोषले धार्मिक आस्थामा आघात पुर्‍याएको आरोपमा जाहेरी दिएपछि मुलुकी अपराध संहिताको दफा १५६ अन्तर्गत अनुसन्धान भइरहेको काठमाडौं प्रहरी प्रवक्ता एसपी दानबहादुर थापाले जानकारी दिनुभयो।

प्रहरीका अनुसार उनीहरूको सात दिनको म्याद थप गरिएकोमा आइतबार उक्त अवधि सकिँदैछ। सोमबार पुनः म्याद थपका लागि अदालतमा उपस्थित गराउने तयारी छ। तर, घटस्थापनादेखि अदालतमा दशैँ बिदा सुरु हुने भएकाले उनीहरूको रिहाइ प्रक्रियामा ढिलाइ हुन सक्ने देखिएको छ। सरकारी वकिलको कार्यालयले हाजिर जमानीमा छाड्न अनुमति दिएमा भने उनीहरू रिहा हुन सक्छन्।

अनुसन्धानमा संलग्न प्रहरीका अनुसार प्रारम्भिक सोधपुछमा उनीहरूले मनोरञ्जनका लागि मात्रै भिडिओ बनाएको देखिएको छ। धार्मिक द्वेष वा घृणा फैलाउने उद्देश्य देखिएको छैन। प्रहरी स्रोतका अनुसार दुवै जनाले धार्मिक सहिष्णुताप्रति प्रतिबद्धता जनाएका छन् र घटनाप्रति पश्चाताप गरिरहेका छन्।

उक्त कसुर प्रमाणित भएमा कानुनअनुसार दुई वर्षसम्म कैद र २० हजार रुपैयाँसम्म जरिवाना हुन सक्ने व्यवस्था रहेको समाचारमा उल्लेख छ। यस्ता कसुरमा धरौटीमा रिहा हुने अभ्यास भए पनि त्यसका लागि अदालतमा थुनछेक बहस आवश्यक पर्ने भएकाले बिदाको समयमा प्रक्रिया प्रभावित हुन सक्ने देखिएको छ।