म्याग्दी, माघ १६ । गण्डकी प्रदेशका मुख्यमन्त्री पृथ्वीसुब्बा गुरुङले पर्यटन विकासको माध्यमबाट गरिबी निवारण गरिने बताउनुभएको छ । म्याग्दीको अन्नपूर्ण गाउँपालिका–४ नारच्याङमा आजदेखि शुरु भएको प्रथम अन्नपूर्ण पर्यटन महोत्सव तथा अध्यक्ष कप खेलकूद प्रतियोगिताको उद्घाटन गर्दै उहाँले गरिबी निवारण र रोजगारी सिर्जनाका लागि पर्यटनको सम्भावनालाई परिचालन गरिने बताउनुभयो ।
“संस्कृति, प्रकृति र साहासिक पदयात्रा मार्ग गण्डकी प्रदेशको पर्यटनको आधार हो,” उहाँले भन्नुभयो “प्रदेशका ११० वटा पर्यटकीयस्थल घोषणा गरेर प्रत्येक जिल्लाका चार वटा नयाँ पदमार्ग खोल्न र पूर्वाधार तयार पार्न रु ४० लाखको दरले बजेट विनियोजन गरेका छौ ।” मुख्यमन्त्री गुरुङले साहासिक पर्यटनको सम्भावना रहेको धौलागिरि चक्रिय, अन्नपूर्ण आधारशिविर पदमार्गमा पूर्वाधार निर्माणमा प्राथमिकता दिने प्रतिबद्धता व्यक्त गर्दै गतवर्ष २७४ वटा घरवास (होमस्टे) स्थापना गर्न रु ३० करोड अनुदान दिएको र यो वर्ष प्रदेश सरकारले ती होमस्टेको सुदृढीकरण गर्न रु २५ करोड विनियोजन गरेको जानकारी दिनुभयो ।
उहाँले महोत्सवका अवसरमा अन्नपूर्ण गाउँपालिकाले तयार पारेको नारच्याङदेखि अन्नपूर्ण आधारशिविर जोड्ने “मौसिज हर्गोज टे«िकङ” पदमार्गको नक्शा पनि सार्वजनिक गर्नुभयो । पदमार्ग सञ्चालनको लागि प्रचारप्रसार गर्ने उद्देश्यले आयोजना गरिएको महोत्सव माघ २१ गतेसम्म सञ्चालन हुने गाउँपालिकाका अध्यक्ष डमबहादुर पुनले बताउनुभयो । आठ वर्षअघि विश्वकै दशांै र नेपालको नवांै (आठ हजार ९१ मिटर) अग्लो अन्नपूर्ण हिमालको आधारशिविर जोड्ने सबैभन्दा छोटो पद्मार्ग पहिचान भएको थियो । सन् १९५० को जुन ३ मा फ्रान्सका मौरिस हार्गोजले पहिलो पटक अन्नपूर्ण हिमालको आरोहण गरेका थिए ।
नारच्याङ हुँदै अन्नपूर्ण आधारशिविर जाने छोटो र सजिलो पदमार्ग तयार भएको सन्देश फैलाउनु महोत्सवको मुख्य उद्देश्य भएको अध्यक्ष पुनले बताउनुभयो । नेपाल भ्रमण वर्ष २०२० को अवसर पारेर नयाँ गन्तव्यका रुपमा “मौसिज हर्गोज टे«किङ” सञ्चालन गर्न लागिएको संरक्षण व्यवस्थापन समितिका अध्यक्ष तेज गुरुङले बताउनुभयो ।
महोत्सवको अवसरमा अध्यक्ष कप खेलकूद प्रतियोगिताअन्तर्गत वडास्तरीय प्रौढ, महिला, पुरुष भलिबल र बाँस्केटबल प्रतियोगिता, एकल र सामूहिक नृत्य प्रतियोगिता र सांस्कृतिक कार्यक्रम सञ्चालन हुने गाउँपालिकाका प्रवक्ता कृष्णप्रसाद बरुवालले बताउनुभयो ।
प्रतिक्रिया दिनुहोस्