काठमाडौं, भदौ १८

अख्तियार दुरुपयोग अनुसन्धान आयोगले तत्कालिन सूचना तथा सञ्चारमन्त्री गोकुल बाँस्कोटासँगको टेप प्रकरणमा जोडिएका विचौलिया विजयप्रकाश मिश्रलाई सात दिने पत्र काटेपछि उनि उत्तालिएका छन् । अख्तियारले गोरखापत्र मै सार्वजनिक सूचना निकालेको छ ।

गोरखापत्रमा सुचना निकालेपछि मिश्रले एक विज्ञप्ती निकालेर आफु नभागेको बरु डिभाइस लिन जापान आएको जानकारी गराएका छन् । ‘सेक्युरिटी प्रिन्टिङ प्रेस खरिद प्रक्रियामा स्विस कम्पनीका स्थानीय एजेन्टसँग ७० करोड कमिसनका लागि मोलमोलाई गरेको भन्ने समेत विषयको अनुसन्धानका सिलसिलामा तपाईंसँग केही बुझ्नुपर्ने भएकाले यो म्याद सूचना प्रकाशित गरिएको छ ।

मिश्रको पहिलो झुट

मिश्रले भदौ २ गते एउटा विज्ञप्ती जारी गरेका छन् । उनको विज्ञप्तीमै मिति गलत रहेको छ । नेपाली अंकमा अंग्रेजी मिति लेखिएको छ । २०२०।०१।०२ उल्लेख गरेर विज्ञप्ती निकालेका छन् । सेप्टेम्बरमा विज्ञप्ती निकालेको हो भने नेपालीमा लेख्दा ०९ हुनुपर्ने हो, ०१ भएको ठाँउमा । तर, उनले अंग्रेजीमा लेख्न खोजेका होलान महिना चाही । यो विषय के हो प्रिन्टिङ प्रेसका कथित विज्ञ मिश्र आफैलाई थाहा होला । विज्ञ भएपछि त नेपाली र अंग्रेजीमा एक र नौ लेख्न पनि आउनु पर्ने होला । यो आफ्नो बौद्धिक हैसियतको कुरा हो ।

तर, उनको झुट यसमा होइन । अर्को विषयमा छ । मिश्रले जारी गरेको विज्ञप्तीमा आफु र अख्तियारका अनुसन्धान अधिकृतबीच बारम्बार कुराकानी भईरहेको भ्रम सिधै उल्लेख गरेका छन् । विज्ञप्तीमा उनले भनेका छन्, ‘अख्तियारीप्राप्त अनुसन्धान अधिकृत र मेरोबीचमा बेलाबेलामा कुराकानी भएको र मैले दर्ता गरेको निवेदनबाट यो कुरा प्रष्ट हुन्छ । …हाल यस प्रकरण हेर्ने अधिकृत सरुवा भई नयाँ अनुसन्धान अधिकृतको पदस्थापना भएको कुरा पत्रपत्रिकाबाट मैले जानकारी पाएको हुँ । मलाई आशा छ उहाहरुले मलाई सम्पर्क गर्नुहुने छ वा म आफैंले पनि उहाँहरुसँग सम्पर्क गरि यस राजनीतिक खोल ओढेको सेक्युरिटी प्रेस खरिद प्रकरणको छानविनलाई आवश्यक सहयोग गर्ने नै छु ।’

यसमा के झुट बोले होला त मिश्रले ? बडो प्रष्ट छ । अख्तियारले मिश्रलाई कतै पनि सम्पर्क गर्न नसकेपछि राष्ट्रिय पत्रिकामा सूचना निकाल्यो । जसरी बैंकले कुनै पनि सामान लिलाम गर्नुपरेमा सो सामानका धनिलाई जानकारी दिन यस्तै सूचना निकाल्छ । त्यसैगरी अख्तियारले पनि सूचना निकाल्यो । जसरी बालुवाटारको जग्गा काण्डमा मुछिएका व्यक्ति सम्पर्कमा नआएपछि सुचना निकालेको थियो । मान्छे भेटेर वा सम्पर्क भईरहेर काम गर्दैछु भनेर जनतालाई देखाउन मात्र अख्तियारले सूचना निकालेको पक्कै होइन् होला । मिश्रलाई पटक पटक सम्पर्क गर्दा र उनको ठेगानामा पत्र पठाउदा पनि कुनै जवाफ नआएपछि पत्रिकामा सूचना नै निकाल्नु परेको अख्तियारस्रोतले जानकारी दिएको छ ।

यो विषय उठ्छ भनेर मिश्रले विज्ञप्तीमा थोरै चलाखी अपनाउन खोजेका छन् । उनले भनेका छन् कि यो प्रकरण हेर्ने अधिकृत सरुवा भई नयाँ आएका रहेछन्, त्यो पनि पत्रिका पढेर थाहा पाए भनेका छन् । स्मरण रहोस्, अख्तियार वा प्रहरीको कुनै पनि अनुसन्धान अधिकृत सरुवा हुँदा वा जागिर छोडेर जाँदा अन्तिम बखतसम्म गरेका सबै कामका सूचना अर्को अधिकृतलाई हस्तान्तरण गरेरमात्र जान्छन् । यति ठुलो मुद्दामा ति अधिकृतले सरुवा भई आएका अधिकृतलाई मिश्रको विषयमा कुनै जानकारी नै दिएनन भनेर कसरी पत्याउनु ?

दोस्रो झुट

दुई पृष्ठ लामो विज्ञप्तीमा उनले आफु भागेको विषयमा भन्दा पनि उनलाई रिस उठेका व्यक्तिलाई गाली गर्नमै विताएका छन् । मानिस हो रिस उठेपछि गर्ने गाली नै हो । त्यो भन्दा विचारा मिश्रसँग अरु के नै छ र । तर, हाम्रो मुद्दा त्यो होइन ।

मिश्रले विज्ञप्तीमा भनेका छन्, ‘अख्तियार दुरुपयोग अनुसन्धान आयोगबाट चलानी नं. ८२२९ को आवश्यक सहयोगको लागि भनी अनुरोध गरिएको पत्र मेरो हात परेको कुरामा दुईमत छैन । त्यसै पत्रको आधारमा रेकर्डिङ डिभाइस मैले अख्तियारलाई बुझाउनुपर्ने र त्यो डिभाइस जापानमा भएको हुँदा डिभाइस लिन म जापान आएको हुँ ।’ मिश्रकै विज्ञप्ती अनुसार गोरखापत्रमा सूचना सार्वजनिक हुनुभन्दा अगाडी नै उपस्थित हुन भनेर अख्तियारको पत्र उनलाई प्राप्त भईसकेको रहेछ ।

अख्तियारको पत्र प्राप्त गरेको भए उनि म डिभाइस लिन जापान जान्छु भनि सामान्य जानकारी पनि नगराई किन उनि जापान भागे ? यहा ‘भागे’ शब्द किन प्रयोग गरियो भने अख्तियारबाट उपस्थित हुन पत्र आएपछि जानकारी गराएर गएको भए भागे भन्न मिल्दैन थियो । तर, यता अख्तियार उनलाई खोज्दै पत्रिकामा सूचना निकाल्ने उनि कसैलाई थाहा नै नदिई डिभाइस लिन गएको भनेर जापानमै आनन्दले बसेपछि भागे नभनेर के शब्द प्रयोग गर्ने ।

अर्को कुरा उनले विज्ञप्तीमा आफु जापान कहिले आएको र कुन मितिमा फर्कने समेत उल्लेख गरेका छैन् । कोरोनाका कारण चैत्रको पहिलो सातादेखि अन्तराष्ट्रिय हवाई उडान बन्द छ । उनलाई यो विषय बाहाना बन्न सक्छ । तर, यहा बिर्सनै नहुने एउटा कुरा छ, यो बीचमा पनि नेपाल एयरलाइन्स र केही अन्तराष्ट्रिय विमानले जापान–नेपाल उडान गरेका छन् । सकेको भए त्यस बखत पनि उनि पनि सोही विमानमा आउन सक्थ्ये । तर, आफुलाई भ्रष्टचारविरोधी अभियान्ता बनाउने मिश्र ७० करोडको काण्ड छाडेर जापानमै आनन्दसँग मोजमस्ती गरे । सायद अब कहिले आउछन् त्यो उनि वा यो समुहमा आवद्धलाई थाहा होला । यद्यपी विज्ञप्तीमा उनले आफु चाडै नेपाल आउने र फ्लाइट निश्चित भईसकेको बताएका छन् ।

तेस्रो ठुलो झुट

मिश्रले विज्ञप्तीमा आफु रेकर्डिङ डिभाइस लिन जापान आएको उल्लेख गरेका छन् । त्यो डिभाइस के हो उनले खुलाएका छैनन् । तर, उनले नै दिएको एक अन्तर्वार्तामा सो अडियो रेकर्डिङ मोवाइलबाट गरेको सार्वजनिक रुपमा कबुल गरेका छन् ।

सुन्नुहोस् मिश्रले दिएको अन्तर्वार्ताको यो अंश

यहा उनले स्पष्ट शब्दमा भनेका छन् । तत्कालिन सञ्चारमन्त्री गोकुल बाँस्कोटालाई भेट्नु अगाडी एक व्यक्तिको फोटो लिनका लागि भिडियो रेकर्डिङ गरिरहेको थिए । त्यही बेलामा बाँस्कोटाले भित्र बोलाउनु भयो, मैले सो डिभाइस गोजीमा हालेर गए । संयोगवस रेकर्डिङ भएछ । तर, मैले यो कुरा करिव डेढ महिनापछि मात्रै थाहा पाए ।

अब उनले अख्तियारमा बुझाउनुपर्ने कुरा के छ भने त्यो व्यक्तिसहितको भिडियो र सो भिडियो रेकर्डिङ गरेको मोवाइल । उनले अन्तर्वार्तामा के समेत भनेका छन् भने फोन ह्याङ हुन्छ भनेर डिलिट गर्दै जाँदा भिडियो भेटिएको र सो भिडियो आफुले सेभ गरेर राखेको बताएका छन् । अब उनले अख्तियारमा पेन ड्राइभमा भएको अडियो मात्र बुझाउछन् कि भिडियो रेकर्डिङ गरेको त्यो मोबाइल बुझाउनछन् केही दिनमा प्रष्ट होला । जसबाट उनको नियत स्पष्ट रुपमा बाहिर आउनेछ ।

आफैसँग भएको मोवाइल फोन लिन उनि कि जापान गए त ? यो प्रश्न आफैमा बडो अचम्मित र शंकास्पद छ । मिश्रको उक्त कुराले सार्वजनिक लेखा समितिका सदस्य भने चकित भएका छन् । ‘हामीलाई आफ्नै मोबाइलबाट अडियो सुनाएका थिए। छुट्टै रेकर्डिङ डिभाइस लिन जापान गएको भन्ने कुरा पत्यार लागेन,’ लेखा समितिका एक सदस्यले भने ।

विभिन्न सञ्चारमाध्यम र सांसदहरूलाई मोबाइलबाटै अडियो ट्रान्सफर गरेर मिश्रले पठाएका थिए । मिश्रले पेन ड्राइभमा पनि अडियो राखेर खल्तीमा बोकेको देखिएको एक सांसदले बताउनु भयो । ‘जापानमा डिभाइस लिन गएको भन्ने कुरा बहाना हुन सक्छ,’ लेखाका ती सदस्यले भने । मिश्र आफू सेक्युरिटी प्रिन्टिङ प्रेसको विज्ञ भन्दै लेखा समितिमा पनि प्रस्तुत भएका थिए । तर केही सांसदले उनको योग्यता र विज्ञतामाथि प्रश्न गरेपछि समितिमा हल्लाखल्ली मच्चिएको थियो ।