गाईघाट, कात्तिक १५

उदयपुरको त्रियुगा नगरपालिका २, खैजनपुरमा धानमा पानी लगाउन मोटर सञ्चालन गर्ने क्रममा करेन्ट लागेर एक महिलाको मृत्यु भएको छ । जिल्ला प्रहरी कार्यालय उदयपुरका अनुसार खैजनपुरकी ३८ वर्षीया रीता बुढाथोकीको यसरी करेन्ट लागेर मृत्यु भएको हो । शुक्रबार बेलुकी ४ बजेतिर धानखेतमा पानी लगाउन मोटर चलाउँदा तत्कालै बुढाथोकीलाई करेन्ट लागेको थियो ।

करेन्ट लागेर बेहोस भई भुइँमा ढल्नुभएको उहाँलाई उपचारका लागि जिल्ला अस्पतालमा ल्याई उपचार गर्ने क्रममा मृत्यु भएको उदयपुरका प्रहरी प्रमुख भीमप्रसाद दाहालले बताउनुभयो । करेन्टले उहाँको शरीरका भित्री र बाहिर अङ्‍ग जलेर कालो भएको थियो । बुढाथोकीको शव परीक्षणका लागि जिल्ला अस्पतालमा राखिएको प्रहरीले जनाएको छ ।