काठमाडौंं, पुष ६

नेपाल कम्युनिष्ट पार्टी (नेकपा)का चार सांसदले आफुहरुको हस्ताक्षर दुरुपयोग भएको बताउनु भएको छ । ‘झुक्काएर’ अविश्वासको प्रस्तावमा हस्ताक्षर गरेका सांसदहरू छक्कबहादुर लामा, शेरबहादुर तामाङ, यज्ञबहादुर बोगटी र बिमला बिक आज बालुवाटार भेलामा उपस्थित हुनु भएको हो ।

प्रधानमन्त्री केपी शर्मा ओलीले आह्वान गरेको बालुवाटार सांसद बैठकमा विघटित प्रतिनिधिसभामा रहेका नेपाल कम्युनिष्ट पार्टी (नेकपा)का ९२ जना सांसद सहभागी भएका छन् । प्रतिनिधिसभा विघटन भएको भोलिपल्ट बालुवाटारमा बोलाइएको बैठकमा कार्यकारी अध्यक्ष पुष्पकमल दाहाल प्रचण्डलाई प्रधानमन्त्री बनाउने भन्दै ओलीविरुद्ध अविश्वासको प्रस्तावमा हस्ताक्षर गरेका ४ जनाको पनि उपस्थिति रहेको हो ।

“आजको बैठकमा हालै विघटित प्रतिनिधिसभाका ९२ जनाको उपस्थिति भएको छ, जसमध्ये ४ जना झुक्काएर अविश्वासको प्रस्ताव दर्ता गराइएका सांसद पनि आउनुभएको थियो,” प्रधानमन्त्रीका प्रेस संयोजक रामशरण बजगाईँले भन्नुभयो, “अन्य केही सांसदहरू गृह जिल्लामा रहेको खबर गर्दै बालुवाटार आउन नपाएको जानकारी गराउनुभएको छ।”