काठमाडौं, बैशाख ७। माधव नेपाल पक्षमा खुलेका कर्णाली प्रदेशबाट प्रतिनिधित्व गर्ने एमालेका चार जना संघीय सांसदले प्रधानमन्त्री एवं पार्टी अध्यक्ष केपी ओलीलाई साथ दिएका छन् ।

सांसदहरू मुगुका गोपाल बम, दैलेखका राजबहादुर बुढा र पार्वती विशुंखे तथा सुर्खेतका ध्रुवराज शाहीले खनाल–नेपाल समूह छाड्नु भएको हो । विशुंखेबाहेक तीनै जना प्रत्यक्ष निर्वाचित सांसद हुनुहुन्छ । प्रधानमन्त्री ओलीसँग छलफलपछि नेपाल समूह छाडेकाले ६ वैशाखका एमालेले उहाहरूसँग स्पष्टीकरण नमागिएको हो ।

नेपालसँगको भेटमा यो टोलीले आफूहरू फुटको पक्षमा नरहेको बताएका थिए । घोषित रुपमा साथ दिन नसक्ने नबताए पनि पार्टी विभाजनको अवस्थामा एमालेमै रहने उनीहरूले नेता नेपालसँग भनिसकेका छन् । यो टोलीले केपी ओलीसँगको भेटमा पनि फुटबाट जोगाउने भूमिका खेल्न आग्रह गरेका थिए । संचारकर्मीसंग कुरागर्दै सांसद शाहीले आफूहरू फुटको पक्षमा नरहेको बताउनु भएको थियो ।

उहाँले भन्नुभयो, ‘माधव नेपाल समूह छाडेको भन्दा पनि फुटको पक्षमा नरहेको र विभाजनको अवस्थामा एमालेमै रहने प्रधानमन्त्रीलाई बताएका थियौँ ।’