काठमाडौं, बैशाख २९

चिकित्सा शिक्षा आयोगले चिकित्सा शिक्षा तर्फका विभिन्न १७ कार्यक्रमको शुल्क सार्वजनिक गरेको छ। आयोगले आज सूचना निकाल्दै एमबिबिएस, बिडिएस, नर्सिङ, आयुर्वेद, फार्मेसी, एमडी/एमएस, एमडिएस, डिएम, एमसिएच लगायतका कार्यक्रमको शुल्क सार्वजनिक गरेको हो। गत बर्ष कायम भई कार्यान्वयनमा रहेका कार्यक्रमको शुल्क यथावत राखी अन्य कार्यक्रमको शुल्क निर्धारण गरेको आयोगले जनाएको छ ।

आयोगको बैशाख ९ गतेको निर्णयानुसार एमबीबीएस काठमाडौं उपत्यका भित्र ४० लाख २३ हजार र उपत्यका बाहिर ४४ लाख ३६ हजार तोकिएको आयोगका सदस्य सचिव डिल्लीराम लुइटेलले जानकारी दिनुभयो । चिकित्सा सम्बन्धि शैक्षिक कार्यक्रम संचालन गर्ने मेडिकल कलेजहरुले आयोगले तोकेको शुल्क भन्दा बढी शुल्क लिन पाउने छैनन ।