काठमाडौं, असार २५

कैलालीमा अन्तरजातीय विवाह गरेर जंगलमा लुकेर बसेको जोडी घर पुग्ने बित्तिकै युवतीका आफन्तको आक्रमणमा परेको छ । अन्तरजातीय विवाह गरेका कैलालीको भजनी नगरपालिका–७ का प्रकाश विश्वकर्मा र मालती रावल सोही आश्वासनपछि २१ दिन जंगलको बसाई टुंग्याएर घर पुगेपछि आक्रमणमा परेको हो ।

आज बिहान युवतीका आफन्तले सहमतिमै छलफल गर्ने र एकपटक सोधपुछ गर्ने भन्दै बोलाएपछि आक्रमण भएको हो । घर पुगेको जोडी केही समयमै युवतीका आफन्तको आक्रमणमा परेको बताइएको छ । दलितलाई छोरी दिन नसकिने भन्दै युवकलाई कुटपिट गरेर युवतीका आफन्तले जबर्जस्ती मालतीलाई लिएर गएका छ्न् ।

यसअघि देशकै राजधानी काठमाडौंमा जातकै कारण कोठा नपाएर पीडित सञ्चारकर्मी रुपा सुनारको घटना नसेलाउँदै हिजो मात्रै अर्को जातीय विभेदको घटना सार्वजनिक भयो । जुम्लाको सिंजा गाउँपालिका–६ का वडा अध्यक्ष कालीबहादुर बुढा र उनका छोराले स्थानीय बिवेन्द्र नेपालीमाथि जातीय गालीगलौज र कुटपिट गरेको खबर सञ्चारमाध्यममा प्रकाशित भएको थियो ।

कैलालीमा अन्तरजातीय विवाह गरेको एक जोडी आक्रमणमा परेसँगै आजै फेरि एउटा अर्को जातीय विभेदको घटना सार्वजनिक भएको हो । केटीपक्षका आफन्तले विश्वकर्माविरुद्ध जवरजस्ती विवाह गरेको मुद्धा हाल्ने धम्की र रुकुम हत्याकण्डामा नवराजलाई मारेजसरी उनलाई पनि मारिदिने धम्की दिएपछि अहिले यो जोडी २१ दिनदेखि जंगलमा लुकेर बसेको थियो । उक्त जोडीले जंगलमा एउटा भिडियो समेत बनाएका थिए ।

जसमा उनीहरुले आफूहरुको ज्यान जोखिममा भएको बताउँदै आफूहरुलाई सबैले सहयोग गरिदिन याचना गरेको देखिन्छ । करिब डेढ मिनेटको उक्त भिडियो दलित अभियन्ता जेबी विश्वकर्माले नेपाल प्रहरीलाई ट्याग गर्दै आफ्नो ट्वीटरमा शेयर गर्नुभएको छ ।

‘हाम्रो घरपरिवारले नमानेका कारण हामीहरु अहिले जंगलमा छौँ,’ विश्वकर्माले यति भनेर आफूहरु बसिरहेको जंगल देखाउनुभएको छ । पृष्ठभुमीमा चराचुरुङ्गीको आवाज पनि प्रष्टै सुनिन्छ । ‘अहिले हामीलाई तपाईंहरुको एकदमै साथ र सहयोग चाहिरहेको छ। यो भिडियो हामीले त्यसैले बनाएका हौँ।’ युवकले भिडियोमार्फत कुरा राख्नुभएको छ ।

‘घरको मान्छेले जवरजस्ती विवाह भनेर मुद्धा हालिरहेका छन्, हामीलाई के–के भनेर धम्क्याइरहेका छन् । हामीहरु जवरजस्ती विहे गरेर आएका होइनौँ, आफ्नै मनले आएका हौँ,’ युवकपछि युवतीले भन्नुभएको छ, ‘मेरो पेटमा बच्चा छ । हामीहरु एकअर्काबाट टाढा हुन सक्दैनौँ । टाढा हुन चाहेका पनि छैनौँ । प्लिज, हामीलाई सहयोग गरिदिनुहोला ।’

युवकले भिडियोमा विहेलगत्तै युवतीका दाइले रुकुम हत्याकाण्डमा नवराजलाई मारिदिने भन्दै म्यासेज पठाएको बताउनुभएको छ । ‘घरपरिवारदेखि रुकुम काण्ड दोहोरिन सक्छ । दाइले मलाई ‘रुकुम काण्ड याद छ कि नाइँ ?’ भन्नुभएको छ । हामीले उहाँले पठाएको म्यासेजको स्क्रिनसट पनि राखेका छौँ ।’ युवकले त्यसपछि स्क्रिनसट देखाउनुभएको छ ।

इलाका प्रहरी कार्यालयका प्रहरी निरीक्षक नरबहादुर साउदले युवक आफूहरुको सम्पर्कमा आइसकेको बताउनुभयो । उहाँले यस विषयमा बुझ्ने भन्दै दुबै पक्षलाई बोलाएको बताउनुभयो । उहाँले दुवै पक्षका कुरा सुनेर यस केसलाई अगाडि बढाउँने सुनाउनुभयो ।