काठमाडौं, १८ चैत । मलेसियालाई आठ विकेटले पराजित गर्दै पपुवा न्युगिनी (पिएनजी) ले त्रिदेशीय अन्तर्राष्ट्रिय टी–२० क्रिकेट शृंखलाको फाइनल खेल्ने सम्भावन जीवित राखेको छ । शनिबार हुने खेलमा नेपालले मलेसियालाई पराजित गरे पिएनजीले फाइलनमा स्थान बनाउनेछ । नेपाल भने यसअघि नै दुबै खेल जित्दै उपाधि नजिक रहेको छ ।

शुक्रबार कीर्तिपुरस्थित त्रिवि क्रिकेट मैदानमा मलेसियाले दिएको १९७ रनको लक्ष्य पिएनजीले १७ ओभर ५ बलमा दुई विकेट गुमाएर पूरा गर्यो । पिएनजीको सानदार जितमा टोनी उराले सर्वाधिक ८६ रन बनाए । उनले ३४ बलमा दुई चौका र १० छक्का प्रहार गरे । यस्तै, कप्तान असद भालाले ७४ रन बनाए ।

मलेसियाका मुहम्मद वफिक र स्याजरुल इद्रिसले समान एक विकेट लिए । यसअघि टस हारेर ब्याटिङमा आएको मलेसियाले निर्धारित २० ओभरमा ६ विकेट गुमाएर १९६ रनको योगफल तयार गरेको थियो । मलेसियका सेद अजिजले सर्वाधिक ६४ रन जोड्दा कप्तान अहमेद फैजले ६३ रन बनाएका थिए । यसबाहेक, जुबैदी जुल्किफ्लेले ४६ र विरन्दीप सिंहले १० रन जोडे ।

पिएनजीका काबुअ मोरेआले सर्वाधिक चार विकेट लिँदा रिले हाकुरे र चाड सोपरले समान एक विकेट लिए । पिएनजीले शृंखलाअन्तर्गत नेपालविरुद्धको दुबै खेल हार्दा मलेसियासँग पहिलो खेलमा पनि पराजित भएको थियो । यस्तै, पिएजनीलाई पहिलो खेलमा हराएको मलेसिया दोस्रो खेलमा भने नेपालसँग ६ विकेटले पराजित भएको थियो ।