जनता टाइम्स

२० असार २०७९, सोमबार १४:५४

बजेटप्रति ओली कटाक्ष– यो देशको होइन, निश्चित घरानाको बजेट भयो


काठमाडौं, २० असार । प्रमुख प्रतिपक्षी दल एमाले अध्यक्ष केपी ओलीले सरकारले आगामी आर्थिक वर्षका लागि ल्याएको बजेट निश्चित घराना र व्यापारीलाई फाइदा पुर्याएर ल्याएको आरोप लगाउनुभएको छ । आज प्रतिनिधिसभाको बैठकमा बोल्दै उहाँले सरकारले आर्थिक वर्ष २०७९/०८० बजेट देशका लागि नभएर निश्चित व्यापारी घरानालाई फाइदा पुग्ने गरी ल्याएको आरोप लगाउनुभएको हो ।

अर्थ मन्त्रालयमा व्यापारी बोलाएर र उनीहरूकै इच्छाअनुसार करको दर परिवर्तन गरिएको भन्दै उहाँले व्यापारीका मान्छे राखेर बजेट बनाउनु आर्थिक अनुशासनहीनताको पराकाष्ठा भएको पनि बताउनुभयो । यसबारे छानबिन गर्न ओलीले माग गर्नुभयो ।

अर्थमन्त्री जनार्दन शर्माले एमाले को हो ? उसले भन्दैमा सिसिटिभी फुटेज दिनुपर्छ ? भनेर दिएको अभिव्यक्तिप्रति प्रतिवाद गर्दै ओलीले यसबारे मन्त्री मात्र होइन, सिंगो मन्त्रिपरिषद्सहित प्रधानमन्त्री जवाफदेही हुनुपर्ने बताउनुभयो । एसपीपीबारे उहाँले सरकारबाटै अन्योलमा राख्ने काम भएको भन्दै विरोध गर्नुभयो । ‘इनफ इज इनफ, अब त अति भयो’ उहाँले भन्नुभयो । एसपीपीका सन्दर्भमा सरकारले जनतालाई अन्योलमा राखेको उहाँको भनाइ थियो ।