जनता टाइम्स

२ भाद्र २०७९, बिहीबार १६:१९

एकै गाउँका ३ जनाको ज्यान गएपछि गाउँ शोकमा, विरोधमा लोकमार्ग अवरुद्ध


सर्लाही, २ भदौ । रौतहटको पौराई जंगलमा भएको अटो दुर्घटनामा ज्यान गुमाउनेको परिवारलाई राहत दिनुपर्ने माग गर्दै पुर्व–पश्चिम लोकमार्ग अवरूद्ध बनाइएको छ । आज बिहान पूर्व–पश्चिम लोकमार्गअन्तर्गत रौतहटको पौराई जंगलमा काठमाडौंबाट आउँदै गरेको प्रदेश ०३–००१ ख २०१ नम्बरको बसको ठक्करबाट बागमतीबाट रौतहटतर्फ जादै गरेको प्रदेश २–२००१ ह २१०९ नम्बरको अटोमा सवार तीन पुरूषको मृत्यु भएको थियो भने एक महिला गम्भीर घाइते हुनुभएको थियो ।

सोही घटनाका मृतकका आफन्तहरूले दिउँसो घटनाका पीडितलाई उचित राहतको माग गर्दे पूर्व–पश्चिम लोकमार्ग अवरुद्ध गरिदिएका हुन् । उनीहरूले लोकमार्गस्थित पुतली चोकमा टायर बालेर बिरोध प्रदर्शन गरेको इलाका प्रहरी कार्यलय कर्मैयाले जनाएको छ । विरोधमा उत्रिएका उनीहरूले सडकमा अटो तेर्सायर अवरुद्ध गरेका थिए । राजमार्ग अवरुद्ध हुँदा पुर्व पश्चिम लोकमार्गमा यात्रारत सयौं यात्रु अलपत्र परेका छन् ।

सडक अवरुद्ध भएको एक घण्टापछि यातायात व्यवसायी संघ र मृतका आफन्तबीच घाइतेको सम्पूर्ण उपचार गर्ने र मृतका परिवारलाई उचित राहत उपलब्ध गराउने सहमतिपश्चात सडक खुलेको जिल्ला प्रहरी कार्यालय सर्लाहीले जनाएको छ । सडक खुलेसँगै सडकमा अलपत्र यातायात र यात्रु गन्तब्यतर्फ लागेका छन् । दुर्घटनाका अटो चालक सर्लाहीको बागमती नगरपालिका–५, टेकानी बस्ने रवि मगर, अटोमा सवार ढंकबहादुर लुंगेली मगर र प्रेम ठाडामगरको मृत्यु भएको इलाका प्रहरी कार्यालय रौतहटले जनाएको छ ।

सोही दुर्घटनामा परेर ढकबहादुरकी श्रीमती सविना लुंगेली मगर समेत गम्भीर घाइते हुनुभएको छ । उहाँको रौतहटकै अस्पतालमा उपचार भइरहेको छ । घटनामा परेका सबै मृतक एकै गाउँको रहेको स्थानीयले जनाएका छन् । एकै गाउँका तीन जनाको दुर्घटनामा ज्यान गएको खबरपछि गाउँ शोकमा डुबेको छ ।