काठमाडौं, ७ भदौ । इङ्ग्लिस प्रिमियर लिग फुटबलमा म्यानचेस्टर युनाइटेडले पहिलो जित निकालेको छ । आज बिहान भएको खेलमा लिभरपुललाई २–१ गोलले हराउँदै युनाइटेडले अङ्कतालिकामा तीन अङ्क जोडेको छ ।

घरेलु मैदान ओर्ल्ड ट्राफोर्डमा भएको खेलमा युनाइटेडका जेडन सान्चो र मार्कस रासफर्डले एक/एक गोल गरे । लिभरपुलका मोहम्मद सलाहले एक गोल फर्काए । खेलको १६औँ मिनेटमा सान्चोले गोल गरेपछि युनाइटेडले अग्रता बनाएको थियो ।

दोस्रो हाफको सुरुवातमै रासफर्डले गोल गरेपछि युनाइटेडले अग्रता दोब्बर बनाएको थियो । खेलको ८२औँ मिनेटमा लिभरपुलका सलाहले गोल गरे । फरवार्ड क्रिस्टियानो रोनाल्डो खेलको ८५औँ मिनेटमा मैदान प्रवेश गरेका थिए । तर लिभरपुले थप गोल गर्न नसक्दा पराजित भयो । जितसँगै युनाइटेडको ३ खेलमा ३ अङ्क भएको छ ।

युनाइटेड तालिकाको १४औँ स्थानमा छ । समान खेलमा २ अङ्ककासाथ लिभरपुल १६औँ स्थानमा छ । तीन खेलमा ९ अङ्क जोडेको आर्सनल अङ्क तालिकाको शीर्ष स्थानमा छ ।