२१ श्रावण २०७६, मंगलबार ००:००

बिष्णु पौडेलको निश्कर्ष : विकासका योजनामा नागरिक निगरानी आवश्यक छ


बुटवल, साउन २१ । नेपाल कम्युनिष्ट पार्टी (नेकपा) का महासचिव तथा पूर्वअर्थमन्त्री विष्णुप्रसाद पौडेलले विकास निर्माणका काममा नागरिक स्तरबाट खबरदारी र निगरानी आवश्यक रहेको बताउनुभएको छ । विकास निर्माणका लागि आएको बजेटको सही सदुपयोग र आयोजनाको गुणस्तरीयताका लागि नागरिकस्तरबाट निरन्तर निगरानी आवश्यक रहेको छ, महासचिव पौडेलले भन्नुभयो ।
बुटवल उपमहानगरपालिका–१० मा बुटवल कालिका क्याम्पसको निर्माण गरिने भवनको आज आयोजित शिलान्यास कार्यक्रममा महासचिव पौडेलले आयोजनाहरुको कार्यान्वयनमा आवश्यक निगरानी पुग्न नसकेका कारण गुणस्तरीयता र समयमा काम सम्पन्न नहुने तथा लागतसमेत बढेर जाने अवस्थाको अब अन्त्य हुनुपर्नेमा जोड दिनुभयो ।

रुपन्देहीको विकासका लागि आफू सधैँ अग्र भागमा रहेर काम गर्न तयार भएको बताउँदै उहाँले आफूले चालू आवमा निर्वाचन क्षेत्र पूर्वाधार विशेष कार्यक्रमको बजेट शैक्षिक संस्थाहरुको पूर्वाधारका लागि लगानी गर्ने योजना बनाएको जानकारी दिनुभयो ।

महासचिव पौडेलले कालिका क्याम्पसले आगामी दिनमा यस क्षेत्रका लागि गुणस्तरीय, जीवनपयोगी शिक्षाका लागि विश्वसनीय शिक्षण संस्थाका रुपमा पहिचान स्थापित गर्नेमा विश्वास व्यक्त गर्नुभयो । उहाँले क्याम्पसको पूर्वाधारलगायत शैक्षिक विकासमा आफ्नो तर्फबाट पूर्ण योगदान रहने समेत स्पष्ट पार्नुभयो ।

उहाँले रुपन्देहीको विकासका लागि ठूलासाना दर्जनौं आयोजनाका काम चलिरहेको र यस क्षेत्रको विकासको कामलाई थप उचाइमा पुर्याउन आवश्यक पर्ने आयोजनाहरुका विषयमा छलफल गरेर अघि बढनुपर्नेमा जोड दिनुभयो ।

प्रदेश सरकारका उद्योग, पर्यटन, वन तथा वातावरणमन्त्री लीला गिरीले शैक्षिक बेरोजगारको अवस्थाबाट मुक्ति दिलाएर दक्ष तथा आवश्यक जनशक्ति उत्पादनतर्फ जोड दिन सकिए मात्र मुलुकको समृद्धि सम्भव रहेको बताउनुभयो ।

बुटवल उपमहानगरपालिकाका प्रमुख शिवराज सुवेदीले शैक्षिक केन्द्रका रुपमा रहेको बुटवलको शैक्षिक विकासका लागि उपमहानगरले प्राथमिकता दिएको बताउनुभयो । करीब रु २० करोडको लागतमा बुटवल उपमहानगरपालिका–१० मा निर्माण हुने क्याम्पस भवन आगामी १८ महीनामा निर्माण सम्पन्न हुने क्याम्पसका प्राचार्य घनश्याम पाठकले जानकारी दिनुभयो ।