काठमाडौं, फागुन १३ । प्रधानमन्त्री पुष्पकमल दाहाल प्रचण्डले शुक्रबार संसदमा प्रतिनिधित्व गर्ने आठ दलबिच भएको सहमति राष्ट्रिय सहमतिकै प्रारूप भएको बताउनु भएको छ ।

शनिबार दिउँसो बालुवाटारमा महेन्द्रनारायण निधिको १०१ औँ जन्मजयन्तीको अवसरमा आयोजित समसामयिक नेपाली राजनीति र निधिजीको विचार विषयक विचार गोष्ठीमा बोल्दै प्रधानमन्त्रीले उक्त कुरा बताउनु भएको हो।

विचार गोष्ठीलाई सम्बोधन गर्दै प्रधानमन्त्री प्रचण्डले भन्नुभयो। ‘हिजो संसदका आठ दलबीच जुन सहमति भएको छ, त्यो ऐतिहासिक छ, त्यो राष्ट्रिय सहमतिकै प्रारूप हो । संसदको सबैभन्दा ठूलो दलबाट राष्ट्रपति निर्वाचित हुन्छ । दोस्रो ठूलो दलको सभामुख र राष्ट्रिय सभाको अध्यक्ष छ । तेस्रो दलको प्रधानमन्त्री छ । संसदका अरू दलहरूबीच पनि समझदारीका साथ अगाडि बढेका छौँ। यो प्रक्रियाबाट हामी कोही पनि बाहिर छैनौँ। यो एकप्रकारले राष्ट्रिय सहमति नै हो ।’

उहाँले मुलुकको अर्थतन्त्र संकटउन्मुख रहेकोले राष्ट्रिय सहमति अनिवार्य बनेको बताउनु भयो । ‘नयाँ सरकार गठनपछि केही सूचक सकारात्मक देखिए पनि अर्थतन्त्र संकटमुक्त छैन। लामो त्याग र बलिदानबाट प्राप्त संघीय लोकतान्त्रिक गणतन्त्र र संविधानमाथिको खतरा टरिसकेको छैन,’ प्रधानमन्त्रीले भन्नुभयो, ‘फागुन ७ गते संविधानले नचिनेका नारा लागे । त्यो गम्भीर कुरा छ । हिजो जसरी संसद विघटन गरियो, संविधानमाथि आक्रमण गरियो। त्यो प्रवृत्ति अन्त्य भइसकेको छैन। त्यसैले पनि लोकतान्त्रिक मूल्य मान्यता र संविधानका पक्षधर शक्तिहरू एकठाउँ उभिनुपर्छ, उभिएका छौँ ।’

उहाँले राष्ट्रपतिमा एकै ब्यक्तिको नाम प्रस्तावित गर्न आफूले एमाले अध्यक्षसँग आग्रह गरेको पनि बताउनु भयो । ‘मैले राष्ट्रिय सहमतिकै लागि कोसिस गरेँ। हिजो एमाले अध्यक्ष केपी ओलीजीसँग पनि तपाई र म मिलेर राष्ट्रिय सहमतिको राष्ट्रपति प्रस्ताव गरौँ भनेँ, तर सम्भव भएन,’ प्रधानमन्त्रीले भन्नुभयो, ‘संविधान, लोकतान्त्रिक मूल्य र मान्यता नस्वीकार्ने शक्तिहरूसँगको सहकार्य सहज हुँदैन, यही निष्कर्षका साथ फेरि हामी एकठाउँ उभिएका छौँ। हामी प्राकृतिक कोर्समा फर्किएका छौँ। यो नै मुख्य कुरा हो ।’

कार्यक्रममा पूर्वप्रधानमन्त्री एवं नेकपा (एकीकृत समाजवादी) का अध्यक्ष माधवकुमार नेपाल, नेपाली कांग्रेसका वरिष्ठ नेता रामचन्द्र पौडेल, नेता शरदसिंह भण्डारी, बिमलेन्द्र निधि लगायतले महेन्द्रनारायण निधिको योगदानबारे चर्चा गर्नुभएको थियो।