चितवन, भदौं ९ । सञ्चारकर्मी रवि लामिछानेविरूद्ध आफ्नै पूर्वसहकर्मी शालिकराम पुडासैनीलाई आत्महत्या गर्न बाध्य हुने परिस्थिति खडा गरेको अभियोगसहित जिल्ला अदालत चितवनमा मुद्दा दर्ता भएको छ ।

लामिछानेसहित उनको कार्यक्रम चलाउने पत्रकार युवराज कंडेल र ‘रूकु’ भन्ने अस्मिता कार्कीलाई पनि आत्महत्या दुरूत्साहनको अभियोग लगाउँदै आइतबार जिल्ला सरकारी वकिलको कार्यालय चितवनले अदालतमा मुद्दा दायर गरेको हो । उनीहरूलाई ५ वर्ष जेल र ५० हजार जरिवाना माग गर्दै जिल्ला सरकारी वकिल कार्यालय चितवनले मुद्दा दायर गरेको हो ।

सरकारी वकिलको कार्यालयले अभियोग पत्रमा चारवटा कुरालाई मुख्य आधार मानेर लामिछानेसहितका तीन जनाले पुडासैनीलाई आत्महत्या गर्न दुरूत्साहन गरेको जिकिर गरिएको छ । अभियोगपत्रमा पुडासैनीले आत्महत्या अघि खिचेको भिडियो, अस्मिता कार्कीको बयान, लामिछाने र कंडेलको बयान र पुडासैनीकसँग निकटका केही व्यक्ति बयानलाई मुख्य प्रमाणका रुपमा प्रस्तुत गरिएको छ ।

आत्महत्यापछि पुडासैनीको मोबाइलमा उनले खिचेको भिडियो भेटिएको थियो । जसमा यूवराज कंडेलले अष्ट्रेलिया जान केटी मिलाइदिने भनेर कार्कीलाई आफूसँग जोडिदिएको बताएका थिए । कंडेलले हेप्न थालेपछि न्यूज २४ टिभी छोडेको त्यसपछि पनि उनले आफूलाई ‘तँ फसिस’, भन्दै धम्क्याएको पुडासैनीले भनेका छन । अदालतमा दायर भएको अभियोगपत्रमा यो भिडियोलाई महत्वपूर्ण प्रमाण मान्दै त्यसमा पुडासैनीले भनेका सबै कुरालाई समेटिएको छ ।

यो प्रमाणलाई अस्मिताको बयानले पुष्टि गरेको अभियोगपत्रमा उल्लेख गरिएको छ । अभियोगपत्रमा जनाइए अनुसार आफूले लामिछाने र कंडेलसँग मिलेर पुडासैनीलाई बलात्कार केसमा फसाइदिने धम्की दिएको अस्मिताले प्रहरीसँगको बयानमा स्वीकार गरेकी छन । उनले न्युज २४ टेलिभिजनको कार्यालयमा आफू गएको फोटो पुडासैनीलाई पठाएकी थिइन । फोटो पठाउँदै अब कार्यक्रम प्रसारण गर्ने भनेर आफूले उनलाई बताएको अस्मिताले बयानमा भनेकी छन ।

‘प्रतिवादीले न्युज २४ टेलिभिजनको कार्यालयको फोटो समेत खिची मृतकको बारेमा कार्यक्रम प्रशारण गरिदिने भनी धम्की दिएको कुरा स्वीकार गरेकी तथा सो अनुसार निजले मृतकले आत्महत्या गर्नु भन्दा केही दिन अगाडि पठाएको सो फोटो मिसिल संलग्न रहेको देखिन्छ,’ अभियोगपत्रमा भनिएको छ । कार्कीले प्रहरीसँगको बयानमा विवाहित पुडासैनीले आफूलाई अविवाहित भन्दै धोका दिएको बताएकी छन ।

आफूलाई धोकामा राखेको थाहा भएपछि सम्बन्ध बिग्रिएको र पनि पुडासैनिले पिछा नछोडेको बयान पनि उनले दिएकी छन । त्यसपछि पुडासैनीको पिछा छोडाइदिन क्यामेरामेन अनिल ढुंगेलमार्फत लामिछाने र कंडेललाई अनुरोध गरेको बयान दिएकी छन । पुडासैनीसँगका मेसेज र अन्तरंग फोटोहरू ढुंगेललाई पठाइदिएको उनको बयानमा उल्लेख छ । यो कुरा ढुंगेलले पनि प्रहरीसँगको बयानमा स्वीकार गरेका छन । कार्कीले पठाएका ती मेसेज आफूले कंडेलसमेतलाई दिएको भन्दै ढुंगेलले प्रहरीमा कागज गरेको अभियोगपत्रमा उल्लेख छ ।

कंडेलले भने यी सबै कुरा इन्कार गर्दै बयान गरेका छन । तर कार्की, ढुंगेल र लामिछानेको बयानले उनको इन्कारी बयानलाई नै खण्डित गर्ने सरकारी वकिलको दाबी छ । समाचार बनाउने क्रममा कंडेलले पुडासैनीलाई गाली गर्ने कुरा लामिछानेको बयानबाट देखिएको अभियोगपत्रमा उल्लेख छ । कंडेलले आफ्नो कार्यक्रम छोडेर अर्को टिभीमा समानान्तर कार्यक्रम चलाउन गएको रिसिवी साँध्न कार्कीसँग मिलेर पुडासैनीलाई धम्क्याएको दाबी अभियोगपत्रमा उल्लेख गरिएको छ ।

लामिछानेले पनि आफूले पुडासैनीलाई आत्महत्या गर्न दुरूत्साहन नगरेको भन्दै बयान दिएका छन । अभियोगपत्रका अनुसार, अरूले नै आफूले कार्यक्रम बनाएको भनिदिएको हुनसक्ने आशंका भने उनले बयानमा गरेका छन्। ‘प्रतिवादी रवि लामिछानेले पुडासैनीलाई आत्महत्या गर्न दुरूत्साहन दिएको तथा सो अनुसारको परिस्थिति खडा गरेकोमा इन्कार भइ बयान गरेको भएतापनि आफूले निजको विरूद्धमा कार्यक्रम बनाएको कसैले भनिदिएको समेत हुनसक्छ र आत्महत्या गरेको हुन सक्छ भनी बयानमा खुलाएको देखिन्छ,’ अभियोगपत्रमा भनिएको छ । लामिछानेको यो बयानलाई अन्य प्रतिवादी, साक्षी र प्रमाणले खण्डन गर्ने दाबी पनि अभियोगपत्रमा गरिएको छ ।

आफूले पुडासैनीलाई धम्की दिएको प्रहरीसमक्ष स्वीकार गरेकी कार्कीले कंडेल र लामिछानेले पनि ब्ल्याकमेल गरेको हुनसक्ने भन्दै उनीहरूलाई मुछेकी छन । उनको यही बयानले पुडासैनीले लामिछानेविरूद्ध भिडियोमा लगाएको आरोप पुष्टी हुने अभियोगपत्रमा उल्लेख छ ।

‘मृतकसँग सम्बन्ध बिग्रिएपछि मेसेज र अन्य कुराकानी सेयर गरिदिएपश्चात निज अनिल ढुंगेल, युवराज कंडेल र रवि लामिछाने सो सम्बन्धमा सल्लाह गरी योजना बनाई निज शालिकराम पुडासैनी हतोत्साही हुने किसिमले व्ल्याकमेल गरी केही कुरा भनेको वा केही कार्य गरेको हुनुपर्छ, त्यसैले पुडासैनीले आत्महत्या गरेको हुनुपर्छ भन्दै सहप्रतिवादी कार्कीले बयान गरेको देखिएबाट यी प्रतिवादीको इन्कारी बयान खण्डित भएको तथा प्रतिवादीको भूमिकाबारेमा मृतकले भिडियोमा खुलाएको विषय पुष्टि भएको छ,’ अभियोगपत्रमा भनिएको छ ।

यसबाहेक प्रमिला शर्मा भूषाल भन्ने एक महिलाले पुडासैनीलाई आफूले अन्तिम पटक हतास अवस्थामा देखेको भन्दै प्रहरीमा कागज गरिदिएकी छन । प्रेमिकाले न्युज २४ का मानिससँग मिलेर फसाउन खोजेका छन, रेपमुद्दा हाल्ने समेत भनेका छन, मर्नुअघि हतास अवस्थामा भेटिएका पुडासैनीले भनेको कुरा उद्धृत गर्दै भूषालले यस्तो बयान गरेको अभियोगपत्रमा भनिएको छ ।

सबैको बयान जोड्दै प्रहरी र सरकारी वकिलले पुडासैनीको भिडियो पुष्टी गरेर लामिछाने सहित तीनजनालाई उनको आत्महत्यामा दुरूत्साहन मुद्दा लगाएको हो । अदालतमा अभियोग पत्र दायर भएसँगै अस्मितासँगको बयान सकिएको छ भने आज रवि र कँडेलसँगको बयानपछि थुनछेक बहश हुनेछ ।