काठमाडौं, २२ असार । प्रमुख प्रतिपक्षी दल नेकपा एमालेले प्रधानमन्त्री पुष्पकमल दाहाल प्रचण्डको राजीनामा माग्दै सदन अवरुद्ध गर्दै आएको छ । गत बुधबार, बिहीबार र शुक्रबार तीनदिनकै राष्ट्रिय सभा बैठक एमालेले अवरुद्ध गरेको छ । गत १८ असारमा भएको सार्वजनिक कार्यक्रममा आफूलाई प्रधानमन्त्री बनााउन प्रितम सिंह एक पटक होइन, धेरै पटक दिल्ली धाएको भन्ने प्रधानमन्त्री प्रचण्डको अभिव्यक्तिलाई एमालेले राजीनामा माग्दै सदन अवरुद्ध गरेको हो ।

राष्ट्रियसभा अध्यक्ष गणेशप्रसाद तिमिल्सिनाले बारम्बार बैठक सञ्चालन गर्ने वातावरण बनाउन आग्रह गरे पनि एमाले सांसदहरु उठेर विरोध जनाइरहेपछि बैठक स्थगित गर्नुपरेको छ । बिहीबार र शुक्रबारको बैठकमा अध्यक्ष तिमिल्सिनाले प्रधानमन्त्री प्रचण्डलाई जवाफ दिने वातावरण बनाउन एमालेलाई आग्रह गर्नुभएको छ । आज बैठक सुरु भएलगत्तै एमालेका सांसदहरुले उठेर विरोध गर्नुभयो ।

यसपछि अध्यक्ष तिमिल्सनाले एमाले सांसद विमला घिमिरेलाई बोल्न समय दिनुभयो । एमाले सांसद घिमिरेले प्रधानमन्त्री प्रचण्डले राजीनामा नदिएसम्म संसद चल्न नसक्ने जानकारी गराउनुभयो । यसपछि राष्ट्रियसभाका अध्यक्ष तिमिल्सनाले एमालेले गरेको प्रश्नको प्रधानमन्त्रीले दिने वातावरण बनाउन आग्रह गर्नुभयो । तर, एमाले सांसदहरुले मानेनन् । उहाँहरुले उठेर बैठक अवरुद्ध गरिरहनुभयो । यसपछि अध्यक्ष तिमिल्सिनाले आइतबार बिहान ११बजेर ३१ मिनेटमा बस्नेगरी बैठक स्थगित गर्नुभयो ।