काठमाडौं, भदौ १८ । अख्तियार दुरुपयोग अनुसन्धान आयोगले ललिता निवास जग्गा प्रकरणमा अनुसन्धानका लागि ५८ जनालाई ७ दिनभित्र आयोगमा हाजिर हुन सूचना जारी गरेको छ ।

अख्तियारले आज पत्रिकामा सार्वजनिक सूचना प्रकाशित गर्दै उनीहरुलाई ७ दिनभित्र अख्तियारमा सम्पर्क गर्न भनेको छ । उक्त अवधिमा सम्पर्क गर्न नआए कानूनबमोजिम हुने पनि सूचनामा उल्लेख गरिएको छ ।

‘तत्कालीन सरकारले प्रचलित कानूनबमोजिमको मुआब्जासमेत दिई अधिग्रहण गरिलिएको साबिक हाँडीगाउँ मौजा हा नं ४५६ को लगत भिड्ने ललिता निवास क्याम्पभित्र पर्ने काठमाडौं, बालुवाटारको २९९ रोपनी सरकारी जग्गा मालपोत कार्यालय, काठमाडौं, डिल्लीबजारका कर्मचारीहरु समेतको मिलेमतोमा विभिन्न मितिमा गैरकानुनी तरिकाले व्यक्ति विशेषलाई फिर्ता दिई अनाधिकृत व्यक्तिहरुलाई जग्गाधनी र मोही कायम गरी भ्रष्टाचार गरेको भन्ने समेत व्यहोराको उजुरीको अनुसन्धानको सिलसिलामा तपाइँसँग केही बुझ्नुपर्ने भएकोले यो म्याद सूचना प्रकाशित गरिएको छ,’ अख्तियारद्वारा बुधबार प्रकाशित सूचनामा भनिएको छ ।

त्यस्तै उक्त सूचनामा अख्तियारले ती व्यक्तिहरुलाई आयोगको अनुन्धान महाशाखामा सम्पर्क गर्न पनि भनेको छ । ‘यो म्याद सूचना प्रकाशित भएको मितिले ७ (सात) दिनभित्र यस आयोगको अनुसन्धान महाशाखा नं। २ मा सम्पर्क राख्न आउनु होला, नआए कानूनबमोजिम भई जानेछ,’ अख्तियारले सूचनामा भनेको छ ।’