जनता टाइम्स

२३ भाद्र २०७६, सोमबार ०९:५०

धरहरा निर्माणमा ढिला–सुस्ती नहोस, समस्याको समाधान नआए मलाई भन्नु : मेयर शाक्य


काठमाडौँ, भदौ २३ । काठमाडौँ महानगरपालिकाका मेयर विद्यासुन्दर शाक्यले पुर्ननिर्माण हुँदै गरेको धरहरा र उपाकु जानेबाटोको निरीक्षण गर्नुभएको छ । वडा–२२ का अध्यक्ष चिनकाजी महर्जन, वडा सदस्य अनिल हाडालगायतको टोलीसहित मेयर शाक्यले निरीक्षण गर्नुभएको हो ।

करीब एक घण्टा त्यहाँ विताउनु भएका मेयर शाक्यले धरहरा निर्माणको कामलाई तिव्रता दिन पनि निर्देशन दिनुभयो । दिगंवत भएका परिवारको सम्झनामा हरेक वर्ष इन्द्रजात्रा नजिकको द्वादशीमा दिगंवत भएका परिवारको शान्तिका लागि उपाकु गर्ने चलन छ । दिगंवत भएका परिवारको सम्झनामा दियो र धूप–वत्ती बाल्दै उपाकु जाने बाटो धरहरा पुर्ननिर्माणपछि लोप हुने हो कि भन्ने आशंका केहीले गरिरहेको भन्दै निरीक्षणकै क्रममा मेयर शाक्यले उपाकु जानेबाटो सधैँभरी खुला रहने जानकारी समेत गराउनुभयो ।

वडाध्यक्ष महर्जनले पनि वडासमिति र स्थानीयको पहलमा उपाकु जाने बाटो खुला गराएको स्मरण गराउँदै धरहरा पुर्ननिर्माणले कुनै अवरोध नहुने प्रष्ट पार्नुभयो । निरीक्षणकै क्रममा मेयर शाक्यले धरहरा निर्माणका क्रममा केही समस्या भए पहिला वडा समितिमा र त्यसपछि समाधान नभए आफूलाई खवर गर्न समेत निर्माण कम्पनीलाई सुझाव दिनुभयो । धरहरा निर्माणको काममा तपाईँहरुले ढिला–सुस्ती गर्न पाउनुहुन्न,’ मेयर शाक्यले भन्नुभयो, ‘केही समस्या भयो भने पहिला वडा समितिलाई भन्नु, त्यहाँबाट पनि समाधान भएन भने मलाई भन्नु, म सहयोग गर्न तयार छु । तर, जसरी पनि समयमा काम सम्पन्न गर्नुपर्छ ।’

मेयर शाक्यले धरहरा सबैको साझा सम्पदा भएको भन्दै स्थानीय र महानगरपालिका जसरी पनि धरहरा बन्नुपर्छ भन्ने अडानमा रहेको पनि प्रष्ट पार्नुभयो । ‘यहाँका सम्पदा संरक्षण गर्नुपर्छ भन्ने चिन्ता हामीलाई छ,’ मेयर शाक्यले भन्नुभयो, ‘हामी निर्माण–पुर्ननिर्माण पनि गर्छौ । सम्पदा पनि बचाउँछौँ । त्यसैगरी वडाध्यक्ष महर्जनले धरहरा पुर्ननिर्माणको काम सन्तोष जनक नभएको भन्दै काममा गति दिन सुझाव दिनुभयो । ‘यहाँका स्थानीय हामी हौँ, हामी धरहरा निर्माणको पक्षमा छौँ,’ उहाँले भन्नुभयो, ‘केही पाहुना आएर समस्या गर्छन भने त्यो मान्य हुँदैन, तपाईँहरु काम नरोक्नुहोस, सहयोग गर्न हामी तयार छौँ ।’

धरहरा निर्माणको ठेक्का पाएको रमन जेवीले निर्माणको २३ प्रतिशत काम सम्पन्न भएको जानकारी दिएको छ । धरहरा निर्माणको जिम्मा पाएको रमन जेवीका प्रोजेक्ट म्यानेजर श्यामचन्द्र श्रेष्ठले अहिलेसम्म करीब ५४ करोड खर्च भएको पनि जानकारी दिनुभयो । उहाँले करीब २३ प्रतिशत काम सम्पन्न भएको भन्दै सकेसम्म निर्धारीत समयमै काम सम्पन्न गर्ने प्रतिवद्धता व्यक्त गर्नुभयो । सो कम्पनीले सन् २०२० को अक्टोवर ७ सम्ममा काम सम्पन्न गर्ने जिम्मेवारी पाएको छ । सो कम्पनीले ३ अर्व ८ करोडमा धरहरा निर्माण गर्ने ठेक्का पाएको हो ।