२३ भाद्र २०७६, सोमबार ००:००

मुलुकको राष्ट्र गान बज्दा नउठने मानिस नेपाली हुनै सक्तैन : सञ्चारमन्त्री बाँस्कोटा


काठमाडौं, भदौ २३ । सञ्चार तथा सूचना प्रविधिमन्त्री गोकुल बाँस्कोटाले चलचित्र क्षेत्र संरक्षण र व्यवस्थित गर्ने गरी चलचित्र ऐन चाँडो ल्याइने जानकारी दिनुभएको छ । नेपाल चलचित्र कलाकार सङ्घको ३२औँ स्थापना दिवसलाई आज सम्बोधन गर्दै मन्त्री बाँस्कोटाले सो जानकारी दिनुभएको हो ।

उहाँले चलचित्रले नेपाली मौलिकता तथा संस्कृतिलाई जगेर्ना गर्न नसकेका कारण दर्शकलाई आकर्षित गर्न नसकेको अवस्थामा विविधताभित्र एकता र राष्ट्रियतालाई बलियो बनाउने विषयलाई प्राथमिकतामा राखेर ऐन ल्याइने बताउनुभयो । उक्त ऐन प्राविधिक कारणले अझै संसदमा पेश नगरिएको जानकारी मन्त्री बाँस्कोटाले दिनुभयो ।

‘केही भ्रमको सिर्जना गर्ने सञ्चार माध्यमले चलचित्र हलमा राष्ट्रिय गान बजाउन नपर्ने, बजेमा उठन नपर्ने सन्देश प्रवाह गरेका छन, । मिडियाले नकारात्मक सन्देश प्रवाह गर्नु राम्रो होइन, मुलुकको राष्ट्र गान बज्दा नउठने मानिस नेपाली हुनै सक्तैन,’ सञ्चारमन्त्री बाँस्कोटाले भन्नुभयो ।

देशको राष्ट्रियतालाई उचाइमा पुर्याउन कलाकार एकताबद्ध हुनुपर्ने बताउँदै मन्त्री बाँस्कोटाले सङ्घलाई भवन निर्माणका लागि जग्गा उपलब्ध गराउन प्रयत्न गर्ने प्रतिबद्धता समेत ब्यक्त गर्नुभयो । कार्यक्रममा सङ्घका अध्यक्ष रवीन्द्र खडका, कलाकार निर शाह, आकाश अधिकारी, कृष्ण मल्ललगायतले चलचित्र ऐनमा कलाकारको हकहित तथा अधिकारलाई समेट्न सुझाव दिनुभएको थियो ।

Quick Links