मस्को, बैशाख २३

रुसको मस्कोस्थित शेरेमेट्येभो विमानस्थलमा आइतबार साँझ आपतकालीन अवतरण गर्नेक्रममा एउटा रुसी यात्रुबाहक विमान दुर्घटना हुँदा कम्तीमा ४० जनाको मृत्यु भएको छ । रुसी राष्ट्रिय ध्वजाबाहक एरोफ्लोटको सुखोई एसएसजे १०० विमानमा ७३ जना यात्रु र पाँच जना चालक दलका सदस्य थिए। विमान अवतरण हुनासाथ विमानमा ठूलो आगलागी भएको थियो ।

रुसी जाँच समितिका प्रवक्ता एलिना मार्कोभ्सकायाले विमान दुर्घटनाबाट ४१ जनाको मृत्यु भएको जानकारी दिनुभयो तर स्वास्थ्यमन्त्री भेरोनिका भोर्टसोभाले ३८ जना बाँच्न सफल भएको बताउँदै मृत्यु हुनेको संख्या ४० मात्र रहेको बताउनुभयो । भिडियो फुटेजमा यात्रुहरु आपतकालीन उद्धार ढोकाबाट बाहिर निस्कन तँछाडमछाड गरेको देखिन्थ्यो ।

शेरेमेट्येभो विमानस्थलबाट उत्तरी शहर मरमान्स्कका लागि उडेको उक्त विमान विमानमा प्राविधिक समस्या रहेको भन्दै शेरेमेट्येभो फर्किएको थियो। विमानस्थलमा जबर्जस्ती उत्रनासाथ विमानमा आगो लागेको थियो। सुपरजेट भनिने रुसी एसएसजे १०० दुई इन्जिनयुक्त जहाज हो। यो विमान सन् २०११ देखि प्रयोगमा ल्याइएको थियो।

यस विमानको उत्पादक सुखोई सिभिल एयरक्र्याफ्टले आइतबार दुर्घटनाग्रस्त विमानको गत अप्रिलको सुरुमै मर्मत गरिएको जनाएको छ। एरोफ्लोटले पाइलटहरुमा करिब एक हजार ४०० घण्टा विमान उडाएको अनुभव रहेको बताएको छ। सोभियत सङ्घ युगको विमानसेवा पुरानो भएपछि उड्डयनका क्षेत्रमा समस्या सामना गरेको रुसले एसएसजे १०० सिरिजका नयाँ विमान विकास गरेको थियो।

यही सिरिजका विमानहरु रुस बाहेक आर्मेनीया र मेक्सिको समेतका अरु देशमा पनि प्रयोग भइरहेको छ।