काठमाडौं, भदौ २२ । नेपाल प्रहरीका प्रवक्ता एवं प्रहरी नायव महानिरीक्षक (डीआईजी) दानबहादुर कार्कीको ‘फूलको बासना सरी’ बोलको गीतको म्युजिक भिडियो सार्वजनिक भएको छ ।

अन्तर्राष्ट्रिय प्रहरी सहयोग दिवसका अवसरमा शनिबार प्रहरी प्रधान कार्यालयमा आयोजित समारोहमा गृहमन्त्री रमेश लेखकले नेपाल प्रहरीले निर्वाह गरिरहेको कर्तव्यबारे सन्देश दिने सो गीत सार्वजनिक गर्नुभयो । प्रहरी महानिरीक्षकको सचिवालयमा कार्यरत डीआईजी कार्कीले शब्द सिर्जना गरेको गीतलाई राजेशपायल राई, मेलिना राई, बेनिसा पौडेल र समीर खरेलले आवाज दिनुभएको छ ।

‘नेपाल प्रहरीको भावना बोल्ने गीत ‘फूलको वासना सरी’ आजबाट सार्वजनिक भएको छ  । घाम, पानी, जाडो नभनी हरेक प्रतिकूलतामा कर्तव्य निर्वाह गर्ने प्रहरी कर्मचारीको अव्यक्त भावना गीतमार्फत बोल्ने प्रयास गरेको छु,’ डीआईजी कार्कीले भन्नुभयो ।

गीतमा दीपक शर्माले संगीत दिनुभएको छ । गीतको भिडियोमा कलाकारहरु रमेश उप्रेती, प्रियंका कार्की, प्रकाश सपूत र विनिशा पौडेलको अभिनय रहेको छ । गीतको भिडियो निर्देशक गम्भीर बिष्ट र यसको कन्सेप्ट सरोज ओलीको रहेको छ ।