पोखरा, पुस १०। रास्वपाका सभापति रबि लामिछाने संलग्न रहेको सूर्यदर्शन सहकारी ठगी प्रकरणमा पूर्वप्रदेश सभा सदस्य मीना गुरुङलाई प्रहरीले पक्राउ गरेको छ ।

एमाले नेता गुरुङलाई मंगलवार कास्कीको पोखरास्थित घरबाटै प्रहरीले पक्राउ गरेको हो । पोखरा १२ रानीपौवा निवासी गुरुङ सूर्यदर्शन सहकारीको पूर्वउपाध्यक्ष हुनुहुन्छ।

उहाँ स्थापनाकालदेखि नै सो सहकारीमा आबद्ध रहनुभएको थियो ।जिल्ला सरकारी वकिलको कार्यालय कास्कीले आइतबार मुद्दा दर्ता गरेकाहरुको सूचीमा गुरुङको पनि नाम छ । गुरुङलाई प्रहरीले फरारको सूचीमा राखेर मुद्दा दायर गरेको थियो ।

जिल्ला प्रहरी कार्यालय कास्कीका प्रवक्ता बसन्त कुमार शर्माले गुरुङलाई पक्राउ गरी हिरासतमा लिइएको बताउनु भयो । आवश्यक कारबाही प्रक्रियाका लागि उहाँलाई अदालतमा पेश गरिने प्रहरीले जनाएको छ ।

सूर्यदर्शन सहकारी ठगी प्रकरणमा पूर्वगृहमन्त्री रवि लामिछानेसहितका व्‍यक्ति र संस्था गरी ६३ जनाविरूद्ध  कास्की जिल्ला अदालतमा मुद्दा दर्ता भएको छ । सोही प्रकरणमा एमाले नेत्री गुरुङलाई पक्राउ गरिएको हो ।