काठमाडौं, चैत १४ । रिपोर्टर्स क्लब नेपालले यस वर्षको ‘मदन भण्डारी स्मृति पत्रकारिता पुरस्कार’ जनता टाइम्स डटकमका अध्यक्ष गणेश बस्नेतलाई दिने निर्णय गरेको छ ।

क्लबका संस्थापक सभापति ऋषि धमलाको सभापतित्वमा पुरस्कार छनौट समितिको आज (बिहीबार) बसेको बैठकले सो निर्णय गरेको हो । क्लब नेपालले हरेक वर्ष प्रदान गर्दैआएको सो पुरस्कार क्लबको चैत १७ गते काठमाडौंको राष्ट्रिय सभागृहमा हुने २७औं वार्षिकोत्सवको अवसरमा प्रधानमन्त्री केपी शर्मा ओलीले सो पुरस्कार प्रदान गर्ने कार्यक्रम रहेको छ । पुरस्कारको राशी नगद एक लाख रुपैयाँ रहेको छ ।

बस्नेत विगत तीन दशकदेखि पत्रकारिता क्षेत्रमा सक्रिय रहनुभएको छ । प्रेस चौतारी नेपालको १० बर्ष नेतृत्व गरेर केही दिनअघि मात्रै बिराटनगरमा सम्पन्न महाधिवेशनबाट नेतृत्व हस्तान्तरण गर्नुभएको छ ।

अपराध अनुसन्धान र खोज पत्रकारितामा स्थापित बस्नेत आफ्नो क्षमता र कुशलता प्रदर्शन गर्दै आउनु भएका बस्नेतले व्यावसायिक पत्रकारिताको संस्थागत विकास र प्रवद्र्धनमा महत्वपूर्ण भूमिका निर्वाह गर्दै आउनु भएकोले मदन भण्डारीको नाममा स्थापित पुरस्कार दिने निर्णय भएको रिपोटर्श क्लवले जनाएको छ ।

पत्रकार बस्नेतले २०५० सालबाट छलफल साप्ताहिकमार्फत पत्रकारिताको सुरूवात गर्नुभएको हो । बस्नेतले एक दर्जनभन्दा बढी साप्ताहिक पत्रिकामा कार्यकारी सम्पादकीय टीमको नेतृत्व गरिसक्नु भएको छ ।

पत्रकार बस्नेतले स्पेसटाईम्स दैनिकको समाचार सम्पादक, राजधानी दैनिकको कार्यकारी सम्पादक, सौर्य दैनिकको सम्पादक र च्यानल नेपाल टेलिभिजनको समाचार प्रमुख (प्रधान सम्पादक) को रूपमा समेत भूमिका निर्वाह गरिसक्नु भएको छ ।

पत्रकार बस्नेतले चीन, अमेरिका, भारत, जापान, दक्षिण कोरिया, जर्मन, फ्रान्स, डेनमार्क, बेल्जियम, नर्वे, फिनल्याण्ड, मलेसिया, हङकङलगायत दुई दर्जनभन्दा बढी देशको भ्रमण गर्नुभएको छ । उहाँ हाल जनताटाइम्स डटकमको अध्यक्ष र प्रधान सम्पादकको भूमिकामा हुनुहुन्छ ।

बस्नेत यही चैत १० देखि १२ गतेसम्म बिराटनगरमा सम्पन्न १०औं महाधिवेशनबाट नेतृत्व हस्तान्तरण गर्नुभएको छ ।