काठमाडौं, चैत १६ । राजावादी आन्दोलनकारीले योजनावद्ध रुपमै एभिन्युज टेलिभिजनका क्यामरापर्सन सुरेश रजकको हत्या गरेको तथ्य खुलेको छ । पत्रकार रजकलाई तीनकुनेको घरमा आगजनीपूर्व कोठाभित्रै थुनिदिएको खुलासा भएपछि योजनावद्ध रुपमै उहाँको हत्या गरिएको तथ्य उजागर भएको हो ।

आन्दोलनकारीले तोडफोड र लुटपाट गरेपछि चेनगेटमा ताला लगाइदिएर भित्रै थुनेपछि रजक बाहिर आउन सकेनन र जलेर ज्यान गुमाउनु परेको दृष्यले देखाएको छ । सामाजिक सञ्जालमा सार्वजनिक भएको एउटा भिडिओमा कोठाभित्रको त्राशदीपूर्ण दृष्य कैद भएको छ । क्यामरापर्सन रजक कोठाभित्र मोबाइल चलाइरहेका देखिन्छ भने बाहिरपट्टि चेन गेटमा ठुलो ताल्चा झुण्डिएको छ । यो भिडियो गेट बाहिरबाट खिचिएको हो ।

सार्वजनिक भएको भिडियोमा आफू थुनिएपछि रजकले मोबाइलबाट कसैलाई सम्पर्क गर्न खोजिरहेको जस्तो देखिन्छ । उहाँले यही कोठाको बाटोपट्टि भित्तामा फुटेको सिसाबाट बाहिर आन्दोलनको दृष्य खिच्नुभएको थियो । टेलिभिजनमा १० महिनादेखि तवल नपाउनु भएपनि रजक सञ्चालक भाष्करराज कर्णिकारको निर्देशनमा आन्दोलनको समाचार कैद गर्न सो स्थानमा खटिनुभएको सहकर्मीहरुले बताएका छन । उहाँले कोठाभित्रको बितण्डाको भिडिओ पनि खिचेको र यही रिसमा आन्दोलनकारीले थुनेर आगो लगाई हत्या गरेको आशंका गर्न सकिन्छ ।

कोठाभित्र रजक थुनिएकै अवस्थामा दुई आन्दोलनकारी युवती भर्याङबाट ओर्लिएका छन् । उनीहरूमध्ये एकजनाको अनुहार देखिएको छ भने अर्कीले स्कार्फले अनुहार ढाकेकी छन । उनीहरू ओर्लिदै गर्दा तल्लो कोठामा ह्वारह्वारी आगो बलिरहेको थियो । रजकको हत्यामा सञ्चालक पनि शंकाको घेरामा परेका छन । एभिन्यूजका सञ्चालक कर्णिकार स्वयं राजावादीको आन्दोलनमा संलग्न भएकोर टेलिभिजनलाई प्रयोग गरेको तथ्य बाहिर आइसकेको छ ।