काठमाडौं, चैत १८ । गैरआवासीय नेपाली संघका सक्रिय अभियन्ता तथा समाजसेवी टिबी कार्की नेकपा (एमाले) मै फर्कनुभएको छ ।

केही समयदेखि भिन्न राजनीतिक धारमा रहनुभएका कार्की एमाले बाहेकका दलबाट मुलुक र प्रवासमा रहेका नेपालीको हित संभव नहुने निश्कर्षसहित फर्कनुभएको हो ।कार्कीलाई नेकपा एमालेका महासचिव शंकर पोखरेल र प्रवासी नेपाली अन्तराष्ट्रिय कमिटीका अध्यक्ष सञ्जय थापासहितका नेताहरूले एमाले केन्द्रीय कार्यालयमा स्वागत गर्नुभयो ।

दुई दशकभन्दा बढी समयदेखि प्रवासी नेपाली समुदायमा सक्रिय रहँदै आउनु भएका कार्की विगतमा पनि वाम आन्दोलनमा संलग्न हुनुहुन्थ्यो । एमालेमै फर्किएपछि कार्कीले आफू समाजवाद उन्मुख राष्ट्र निर्माणको अभियानमा एमालेमार्फत योगदान दिन प्रतिबद्ध रहेको बताउनु भयो ।

कार्कीले एमालेको नेतृत्वबिना मुलुकको समृद्धि संभव नभएको र बिदेशमा रहेका नेपालीको समस्या समाधानमा पनि एमालेबाट मात्रै संभव भएकोले आफू सोहीअनुसार योगदान गर्न फर्किएको बताउनु भयो । एमाले प्रवेशपछि कार्कीले प्रवासी नेपालीहरूको हकहितका लागि अझ प्रभावकारी रूपमा कार्य गर्ने प्रतिबद्धता पनि जनाउनु भएको छ ।

कार्कीलाई स्वागत गरेपछि एमाले महासचिव पोखरेलले कार्कीलाई स्वागत गर्दै पार्टीले मुलुकका राष्ट्रिय, अन्तर्राष्ट्रिय स्तरका अभियन्ताहरूलाई जोड्दै अघि बढ्ने बताउनु भयो । उहाँले योग्यता र क्षमताअनुसारको जिम्मेवारी प्रदान गर्ने जानकारीसमेत दिनुभएको छ ।