काठमाडौ, २१ चैत्र । इजरायलले गाजा क्षेत्रमा पुनः आक्रमण तीव्र पारेको छ । इजरायली रक्षा बल (आईडीएफ) ले गाजा क्षेत्रमा गरेका आक्रमणमा पछिल्लो २४ घण्टामा कम्तीमा ५७ जना मारिएका छन् । ५५ जना घाइते भएका अल जजिराले जनाएको छ ।

उत्तरी सहर जबालियास्थित इन्डोनेसियाली अस्पतालका अनुसार विस्थापित परिवारले आश्रय लिइरहेको संयुक्त राष्ट्रसंघीय क्लिनिकमा भएको आक्रमणमा ९ बालबालिकासहित कम्तीमा १९ प्यालेस्टिनी मारिएका छन् । तर स्थानीय अस्पतालहरूले रातभर भएका आक्रमणमा मारिनेको संख्या कम्तीमा २० रहेको जनाएका छन् ।

नागरिक रक्षा विभागले बुधबार जबालियामा भएको आक्रमणमा प्यालेस्टिनी शरणार्थीका लागि संयुक्त राष्ट्रसंघीय एजेन्सी (उनर्वा) ले आश्रयका रूपमा प्रयोग गर्दै आएको क्लिनिकका दुई कोठामा क्षति पुर्‍याएको बताएको छ । ती आक्रमणमा कम्तीमा २२ जनाको ज्यान गएको हो ।

बीबीसीले प्रमाणित गरेका ती घटनाका भिडियोमा दर्जनौं मानिस तथा एम्बुलेन्स भवनतिर दौडिरहेका देख्न सकिन्छ । दुई तला भत्केको देखिने भवनबाट धूवाँ निस्किरहेको भिडियोमा देख्न सकिन्छ । उनर्वाकी प्रवक्ताले एसोसिएटेड प्रेससँग एजेन्सीको एउटा भवनमा आक्रमण भएको जनाएकी छन् । तर आक्रमण किन भएको वा त्यसमा भएको हताहतीबारे उनले केही उल्लेख गरिनन् ।

बीबीसीका अनुसार नागरिक रक्षा विभागले दक्षिणी खान युनिस क्षेत्रको एक घरबाट बालबालिका र महिलासहित १२ जनाको शव निकालेको बताएको छ । एक स्थानीय रिदा अल–जब्बौरले मृतकमध्ये एक छिमेकी र उनको तीन महिनाको बच्चा रहेको बताएकी छन् । ‘हडताल भएको क्षणदेखि हामी बस्न वा सुत्न वा केही गर्न सकेका छैनौं,’ उनले समाचार संस्था रोयटर्ससँग भनेकी छन् ।

आईडीएफले भने त्यहाँ लुकेका ‘हमास आतंककारी’ लाई लक्षित गरिएको दाबी गरेको छ । आईडीएफले एक विज्ञप्तिमा ‘आतंकवादी गतिविधि समन्वय गर्न प्रयोग गरिने र केन्द्रीय बैठकको केन्द्रका रूपमा काम गर्ने कमान्ड–एन्ड–कन्ट्रोल सेन्टर’ मा आक्रमण गरिएको दाबी गरेको छ । ‘आक्रमणअघि हवाई निगरानी र थप गुप्तचर सहयोगसहित नागरिकलाई हानि पुर्‍याउने जोखिम कम गर्ने उपायहरू चालिएको थियो,’ आईडीएफले भनेको छ ।

त्यस्तै, आईडीएफले इजिप्टको सीमा क्षेत्रमा पनि व्यापक आक्रमण गरेको बीबीसीले उल्लेख गरेको छ । योसँगै इजरायलले गाजामा ठूलो स्थलगत आक्रमण गर्ने तयारी गरिरहेको देखिएको छ । आईडीएफको रेडियोले बुधबार ट्यांकसहितका इजरायली स्थल सेना दक्षिणी सहर रफाहको मध्य र पूर्वी भागमा अघि बढिरहेको जनाएको छ ।

इजरायलका रक्षामन्त्री इजरायल काट्जले गाजामा घातक इजरायली हवाई आक्रमणहरू गरिएको पुष्टि गरेका छन् । काट्जले विस्तारित कारबाहीको उद्देश्य ‘आतंककारी र आतंकवादी पूर्वाधारको क्षेत्र नष्ट र खाली गर्नु’ भएको बताएका छन् । उक्त कारबाहीका लागि प्यालेस्टिनीहरूको ठूलो संख्या स्थानान्तरण गर्न आवश्यक हुने उनको भनाइ छ ।

आईडीएफले सुरक्षा क्षेत्र कायम गर्नका लागि आफ्नो आक्रमण अझै विस्तार गर्ने र प्यालेस्टिनी क्षेत्रको ठूलो क्षेत्र कब्जा गर्ने उनले चेतावनी दिएका छन् । आईडीएफले गत साता नै रफाहका अनुमानित १ लाख ४० हजार स्थानीयलाई आफ्नो घर छाड्न आदेश दिएको थियो । त्यस्तै, उत्तरी गाजाका केही स्थान पनि खाली गर्न चेतावनी दिएको थियो । युद्धका क्रममा इजरायलले गाजाको किनारा वरिपरिको क्षेत्रमा पनि नियन्त्रण कायम गरिसकेको छ ।

इजरायलले आक्रमण तीव्र पारेसँगै जर्मनीले गाजाबाट १९ जना नागरिकको उद्धार गरेको छ । जर्मन विदेश मन्त्रालयले १९ जना जर्मन नागरिक र उनीहरूका १४ जना आफन्तलाई गाजाबाट बाहिर निकालिएको जनाएको हो । जर्मन र इजरायली अधिकारीबीचको समन्वय र सहयोगमा उनीहरूको उद्धार गर्न सम्भव भएको मन्त्रालयकी प्रवक्ता क्याथ्रिन डेस्चाउरले बताइन् ।

इजरायलले गाजा क्षेत्रमा जारी युद्धविराम विस्तारका लागि अमेरिकाले अघि सारेको प्रस्ताव प्यालेस्टिनी समूह हमासले अस्वीकार गरेको जनाउँदै १८ मार्चमा गाजामा नयाँ आक्रमण सुरु गरेको हो । त्यसयताका आक्रमणमा करिब एक हजार जनाको ज्यान गइसकेको छ ।

हमासले मध्यस्थकर्ता इजिप्ट र कतारले अघि सारेको ५० दिनको युद्धविराम र त्यसको बदलामा पाँच जीवित बन्धक रिहा गर्ने युद्धविराम प्रस्ताव स्वीकार गरेको थियो । प्रस्तावमा इजरायलले गाजा क्षेत्रमा सहायताका लागि अनुमति दिने र सयौं प्यालेस्टिनी कैदीलाई रिहा गर्ने उल्लेख थियो । तर उक्त प्रस्ताव अस्वीकार गरेको इजरायलले अमेरिकासँगको समन्वयमा अर्को प्रस्ताव अघि सारेको थियो । अमेरिका सहमत भएको भनिएको प्रस्तावबारे भने थप केही बताइएको छैन ।

हमास र इजरायलबीच १९ जनवरीमा युद्धविराम सम्झौता लागू भएको थियो । युद्धविरामको अवधिमा हमासले ३३ इजरायली र ५ थाईलाई बन्धक मुक्त गरेको छ । त्यसको बदलामा इजरायली जेलमा रहेका करिब १९ सय प्यालेस्टिनी रिहा भएका छन् । इरान–समर्थित समूह हमासको नियन्त्रणमा अझै ५९ जना बन्धक छन् । तीमध्ये नेपाली युवा विपिन जोशीसहित २४ जना जीवित रहेको इजरायली प्रधानमन्त्री कार्यालयले जनाएको छ ।

हमासले ७ अक्टोबर २०२३ मा इजरायलमा आक्रमण गरेसँगै दुई पक्षबीच युद्ध चर्केको हो । हमासको आक्रमणमा १२ सय जनाको ज्यान गएको थियो भने २ सय ५१ जनालाई बन्धक बनाएर लगेको थियो । त्यसयता युद्धमा गाजाका २३ लाख मानिसहरूमध्ये ९४ प्रतिशत विस्थापित भएका छन् । ६० प्रतिशतभन्दा बढी संरचना ध्वस्त भएका छन् ।

गाजास्थित स्वास्थ्य मन्त्रालयका अनुसार ७ अक्टोबर यताको युद्धमा ५० हजार ४ सय २३ प्यालेस्टिनीले ज्यान गुमाइसकेका छन् । तीमध्ये आधाभन्दा बढी महिला र बालबालिका छन् । इजरायली आक्रमणमा कम्तीमा १ लाख १४ हजार ६ सय ३८ घाइते भएका छन् ।