काठमाडौं, १ भदौ । प्रधानमन्त्री केपी शर्मा ओलीले सूचना प्रविधिको उपयोग गरेर सुशासन, विकास र समृद्धिको तीव्रता दिनुपर्नेमा जोड दिनुभएको छ ।

राष्ट्रिय युवा सङ्घ नेपालद्वारा आयोजित अन्तर्राष्ट्रिय सूचना प्रविधि युवा सम्मेलन, २०२५ लाई भर्चुअल रूपमा आज सम्बोधन गर्दै नेकपा एमाले)का अध्यक्षसमेत रहनुभएका प्रधानमन्त्री ओलीले समृद्ध नेपाल, सुखी नेपालीको राष्ट्रिय आकाङ्क्षा पूरा गर्न सूचना प्रविधिको उपयोग अनिवार्य भएको बताउनुभयो । उहाँले आफ्नो पहिलो प्रधानमन्त्रीको कार्यकालमा सिङ्गो मुलुकलाई प्रविधिमैत्री तुल्याउन डिजिटल नेपालको फ्रेमवर्क तयार गरेको र अहिले त्यसलाई कार्यान्वयनको काम भइरहेको बताउँदै हालै आर्टिफिसियल इन्टेलिजेन्ट्स (एआई) सम्बन्धी नीति ल्याएको उल्लेख गर्नुभयो ।

उहाँले कानुनमा संशोधनमार्फत नेपालमै बसेर सूचना र प्रविधिका क्षेत्रमा विदेशमा कम्पनी खोल्न सकिने व्यवस्था गरिएको पनि उहाँले स्मरण गर्नुभयो । ‘हामी देश, समाज र सिङ्गै मानव जातिलाई अझ उन्नत र परिष्कृत बनाउन सूचना प्रविधिको उपयोग गर्नुपर्छ, सुशासन कायम र भ्रष्टाचार नियन्त्रणमा यसलाई प्रयोग गर्दै विकासमा व्यापकता, सामाजिक सद्भाव र नवीनताका लागि सहयोग लिन आग्रह गर्दछु’, उहाँले भन्नुभयो ।

प्रधानमन्त्री ओलीले अनलाइन कक्षाबाट गत वर्षको एसइई परीक्षाको परिणाममा सुधार ल्याउन सकिएको बताउनुभयो । ‘हामीले गत वर्षको एसइईमा अनलाइन कक्षाका माध्यमबाट १४ प्रतिशतसम्म नतिजामा सुधार ल्याउन सकेका छौँ, यस्तै स्वास्थ्य र अन्य क्षेत्रमा पनि सूचना प्रविधिको उपयोग गर्दै आएका छौँ, यसको दुरुपयोगबाट हुने कमीकमजोरी र विकृतिप्रति हामी सजग हुनुपर्छ’, उहाँले भन्नुभयो ।

प्रधानमन्त्री ओलीले सरकार प्रेस तथा अभिव्यक्तिका पक्षमा रहेको स्पष्ट गर्दै समाजलाई हानी पुग्ने खालका सूचना सम्प्रेषण भने गर्न नहुने बताउनुभयो ।